MITALIWAN na sa laing kalibutan ang nabantog nga manglutoay og bakasi sa lungsod sa Cordova nga si Florencio “Entoy” Escabas niadtong Hunyo 15 sa edad nga 72-anyos.
Si Escabas maoy tag-iya sa nabantog nga kan-anan nga Ka Entoy sa Barangay Buagsong, lungsod sa Cordova nga gidagsa kanunay sa mga dumuduong sukad niadtong 2002.
Si Ginalyn Tura nga maoy kinamanghurang anak ni “Entoy”, mikompirmar sa Superbalita Cebu sa kamatayon sa ilang amahan.
Matod niya nga niadtong Hunyo 14 kalit nga adunay gipamati sa lawas ang iyang amahan. Ila kining gipa-admit sa usa ka pribadong tambalanan sa Dakbayan sa Lapu-Lapu.
Apan nianang Hunyo 15 sa kaadlawon, namatay si Entoy.
Acute coronary syndrome kun sakit sa kasingkasing ang namatyan sa ilang amahan, dili coronavirus disease (Covid-19).
Gilubong hinuon kini dayon nianang Hunyo 16 gumikan kay protocol sa pagkakaron nga di pabilaran samtang naa pa ang Covid-19.
Taudtaud na hinuon nga adunay gihambing balatian ang ilang amahan, sumala pa ni Tura.
“In-ana man gyud mawala man gyud ta, dili man gyud ta permanente sa kalibutan. Kalit gyud kaayo,” matod ni Tura.
Nipasalig hinuon si Tura nga siya, uban ang iyang tulo ka mga igsuon, maoy modumala na sa ilang nabantog nga kan-anan, busa way angay kabalak-an ang ilang mga kustomer.
Giingong taod-taod na usab nga aduna silay tigluto nga gisaligan sa iyang amahan hinungdan nga wala ra kaayoy kausaban sa timpla.
Nanghinaot lang si Tura nga ang ilang naandang pwesto sa ilang kan-anan magpabilin bisag wala na ang ilang amahan.
Iyang giangkon nga nag-abang ra sila sa ilang pwesto sulod na sa 18 ka mga tuig.
Sa pagkakaron abli na pagbalik ang ilang kan-anan human nga nasirado niadtong panahon sa enhanced community quarantine (ECQ).
Apan dili pa kaayo dagsa ang mga customer sanglit di pa mahimong makabisita sa lungsod ang taga laing dapit sama sa Lapu-Lapu, Mandaue ug ubang lugar.
“Ug wala among tigluto, kami kamao man sad mi magluto. Kato bitawng panahon sa enhanced community quarantine nga na close mi, naa may manawag nako nga mangita gyud mao magluto na lang mi ug mag deliver na lang,” matod ni Tura.
Ang pamilyang Escabas nagsugod sa pagpanakop ug pagpaninda og bakasi niadtong dekada 80.
Hangtod nga nakapatukod og kan-anan niadtong 2002 gumikan sa awhag sa mga lumolupyo nga gilamian sa ilang timpla panahon nga sila magkaon-kaon sa ilang lugar.
Si “Entoy” na feature na usab sa Street Food sa Netflix gumikan sa iyang pagka maayo moluto og bakasi. (GCM)