WALA pa'y insakto nga petsa kanus-a subling ablihan ang Roxas Night Market nga maoy nagsilbing usa sa mga atraksyon sa Davao City, ma lokal man o langyaw nga mga turista.
Atol sa radio interview sa 87.5 FM dcDR ngadto kang Davao City Mayor Sara Duterte-Carpio, giingon niini nga alang niya dili puwede nga dugayon ang pagpadayon sa mga negusyo ug trabaho.
"Of course, di nato gusto nga next year pa because dili nato gusto padugayon ang delay sa pagbalik sa trabaho and sa negosyo sa tao," ingon ni Duterte-Carpio.
Temporaryo nga gisirad-an ang night market gumikan sa Covid-19 pandemic, apan gipaubos sa programa sa gobyerno ang mga vendors niini aron makabawi sa ilang kitaon unta matag gabii sud lamang sa napulo ka adlaw.
Gibutyag sab sa mayor ang hisgutanan nga kung bayaran sab ba ang mga nagtrabaho sa mga negusyo sa establisyemento nga nagsirado atol sa enhanced community quarantine (ECQ) ug sa general CQ.
"Dili kinahanglan bayran tong days nga sarado ang tindahan sa mga City Economic Enterprises na mga business stalls ug spaces sa City Government of Davao," dugang sa mayor.
Una niini, migula ang kabalaka sa mga vendors sa Roxas dihang gihugun-hugonan nga sa Enero 2021 pa ablihan ang night market. (Jeepy P. Compio)