MAGSAYSAY, Davao del Sur -- Gibutyag ni Mayor Arthur Davin nga nakabalhin na ang kapin 100 ka pamilyang nanimuyo sa mga evacuation centers ngadto sa ilang bag-ong mga balay human nahimong biktima sa sagunong linog niadtong tuig 2019.
Si Davin, atol sa Network Briefing kauban si Secretary Martin Andanar niadtong Lunes, nitataw nga kapin 300 ka housing units na ang natukod sa National Housing Authority (NHA) sa ilang lugar ug nagpadayon pa ang konstruksyon sa dugang 2,000 ka mga balay.
Matod sa mayor nga adunay 124 ka housing units ang gitakdang ipa-raffle ug laing 234 ang gi-trabaho na aron mahatag sa mga pamilyang apektado karong buwan sa Agosto.
Mokabat sa 13 ka mga relocation sites ang napalit sa lokal nga gobyerno gikan sa pondo sa mga donasyon sa mga pribadong organisasyon ug tabang sa nasyonal nga mga ahensya ug ubang lokal nga gobyerno sa nasud.
Gitataw ni Davin nga dako og tabang kanila ang Bayanihan Grant sanglit nakahimo sila og mga isolation units ug napaayo ang ubang istruktura human naguba sa linog diin nagamit na karon sa mga gidudahang suspek sa coronavirus disease (Covid-19).
Mapasalamaton sab ang mayor human nag-negatibo na ang duha ka mga locally stranded individuals nga wa'y dokumento sa pagpauli sa lungsod human sa duha ka swab tests apan nagpabilin pa sa ilang isolation facility. (Orlando B. Dinoy)