Online transaction giplano sa Lapu-Lapu City

ARON kalikayan ang posibleng pagkatap sa coronavirus disease (Covid-19) sa Dakbayan sa Lapu-Lapu, ang City Hall mipatuman og one-way lane alang sa mga dunay transaction.

Kini aron kalikayan ang pagsugatsugat sa mga tawo o pagpunsisok.

Mao kini ang gipahibawo ni Lapu-Lapu City Mayor Junard “Ahong” Chan nunot sa kabalaka sa pipila ka mga sector nga delikado sa virus ang kanunay nga pagdasok sa mga tawo sa city hall.

Diha pay mga sugyot nga i-lockdown ang city hall human dunay pipila ka mga opisyal nga positibo sa novel coronavirus, kagaw nga nagdala sa Covid-19.

Unang nagpositibo sa kagaw si Chan samtang nisunod si City Councilor Rico Amores.

Sumala pa ni Chan nga gibutangan na usab nila og division nga plastic ang mga buhatan sa city hall aron masigurong way direct physical contact ang mga tawo ug staff sa city hall.

Gisiguro na usab nga adunay physical ug social distancing ang mga maghuwat sa ilang turno. Gitun-an na usab karon sa kagamhanan ang posibilidad nga ipaagi na lang sa online ang mga transaction sa city hall aron maminusan ang face-to-face contact tali sa mga empleyado ug mga tawo.

Moanunsyo lang unya ang mayor sa paagi kalabot niini.

Kini nunot usab sa padayong pagsaka sa mga infected sa Covid-19 sa dakbayan.

Kagahapon sa buntag, Enero 23, moabot sa 42 ka bag-ong mga kaso ang natala sa dakbayan.

Mao na kini ang labing daghan nga mga kaso sa dakbayan sa usa ka adlaw sukad masukad, sumala pa ni Chan.

Gimandoan na ni Chan ang kapulisan ug ubang force multiplier sa pag-estrikto sa pagdakop sa mga community quarantine violator sama sa walay quarantine pass, facemask ug wa motuman sa number coding kay lisod alang sa mayor kon magpadayon og saka ang mga kaso sa dakbayan.

Ang 42 ka mga bag-ong kaso nagagikan sa Brgy Basak nga may lima ka mga kaso; Canjulao (6); Gun-ob (8); Ibo (1); Looc (1); Pajac (4); Pajo (13); Pusok (2); ug Mactan (2).

“Atong gamiton ang teknolohiya nga dako kaayo og ikatabang ning panahon sa pandemia,” matod ni Chan. (GCM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph