GILIMITAHAN lang ngadto sa upat ka minatay ang ipa-agi sa cremation sa matag punerarya sa Sugbo.
Kini gumikan sa protocol nga gipatuman ilabi na niining nasinating public health crisis resulta sa coronavirus disease.
Nasayran sa Superbalita Cebu gikan sa duha ka mga nag-unang punerarya sa Sugbo nga limitado lang sa upat ka mga patayng lawas ang ilang masunog o cremate.
Si Sharon Cabaluna, ang tagdumala St. Peter’s Funeral Homes, miingon nga moabot ngadto sa kapin 10 ka mga client ang magpangutana sa ilang cremation matag adlaw.
Nasuta nga ang ilang makina moabot ngadto sa tulo ngdto sa upat ka oras una hingpit masunog ang lawas sa minatay.
Samtang kadtong dili na madala og cremation nga misobra sa upat motanyag sila og “immediate burial”.
Kini nagpasabot nga ilubong dayon sulod sa 24 oras ang patayng lawas.
Bisan og adunay motuary freezer ang St. Peter nga mamahimong makapresebar sa lawas samtang wala pa ang schedule sa cremation apan usa lang ang ilang ma-accommodate niini.
Sa matag patayng lawas, mag-agad ang mga prunerarya sa rekomendasyon sa doktor kkon gikinahanglan ba nga i-cremate, immediate burial o I-embalsamar.
Apan sigon ni Oliver Gallardo, ang operation manager sa Rolling Hills Funeral Homes, nga dili sab sila mosugal og embalsamar sa mga patayng lawas aron malikay ang ilang mga kawani sa mga makatakod nga sakit.
Ang Rolling Hills susama sab sa St. Peter nga kutob lang sa upat ka lawas ang ilang ma-cremate sa usa ka adlaw.
Ang maong mga punerarya mipahibawo nga mamahimo pang ma-cremate ang lawas bisan malapas kini sa 24 oras gikan sa pagkamatay sa higayon nga masulod sa freezer.
Apan ang sagad nga adunay freezer sa Sugbo ang mga pribadong hospital ug dugang na sab kini sa bayranan sa tagtungod.
Sa laing bahin, si Mandaue City Councilor Nerissa Soon-Ruiz nahibawo sa maong sitwasyon nga dili sayon ang pagpa-cremate sa mga patayng lawas tungod sa kuwang sa resources.
Hinungdan nga mitanyag siya og resolution nga mihangyo sa dakbayan sa Mandaue nga magtukod og laing menteryo tungod hapit na mapuno ang publikong sam-ang sa dakbayan.
Gawas niini mihangyo sab si Ruiz pinaagi sa pagpalabang og resolution nga magtukod ang dakbayan og crematory van ug mortuary freezer.