SUPERBALITA CEBU

Cebu City quarantine pass gisuspenso

GISUSPENSO na sa kagamhanan sa dakbayan sa Sugbo ang tanang quarantine pass (Qpass) nga gi-isyu ngadto sa 250,000 ka mga tawo.

Epektibo kagabii, dili na balido ang quarantine passes nga giisyu sa Cebu City niadtong Abril.

Kini maoy gikonpirmar sa hepe sa Police Regional Office 7, Police Brigadier General Albert Ignatius Ferro, atol sa meeting sa National Inter-Agency Task Force kagabii, Martes, Hunyo 23, 2020, diin gibutyag ni Cebu City Mayor Edgardo Labella nga kanselahon ang quarantine pass nga ilang giisyu.

Tungod niini tanang police station sa dakbayan sa Sugbo gimandoan nga pahugtan ang pagsusi sa mga tawo nga mogawas sa ilang mga barangay sugod karong adlawa.

Apan iyang gipasabot nga mo-re-issue ra og quarantine passes diin usa lang sa usa pamilya ang hatagan niini nga mahimong makapalit sa ilang panginahanglanon sama sa pagkaon ug medisina.

“Nag-istorya si mayor he told the body that acceding to the recommendation of RIATF for the cancellation of 250,000 quarantine pass, so daghan kaayo diba?,” matod pa ni Ferro.

Apan mipasabot ang heneral nga mahimo ra nga makagawas ang mga authorized person gawas sa ilang pamimalay sama sa frontliners, mga sakop sa media ug ubang mga gitugotan nga makatrabaho sa dakbayan sa Sugbo.

Lakip na ang nagdeliver sa mga pagkaon, call center agent ug kadtong nagtrabaho sa mga tambalanan.

Karong adlawa, Hunyo 24, o kaha ugma, Hunyo 25, magtagbo silang Ferro ug Labella alang na sa pagplano labot sa paghatag sa laing quarantine pass sa matag pamilya.

Lakip sa ilang hisgutan mao ang plano nga himuong schedule ang pagtugot sa mga residente sa mga barangay sa dakbayan sa Sugbo nga makaadto sa mga grocery stores.

Matapos ang lockdown sa tibuok dakbayan sa Sugbo kung libkason na ang enhanced community quarantine, mahimo ra nga makagawas ang mga residente sa ilang kabalayan apan diha lang sila sa ilang tagsa-tagsa ka barangay.

Kung adunay grocery store sa ilang lugar diha lang una sila makapalit sa ilang pagkaon gamit ang quarantine pass nga gihatag sa barangay.

Sa laing bahin si gipahibawo ni Cebu Governor Gwendolyn Garcia nga ibalik ang hugot sa border controls ug checkpoints sa lalawigan sa Sugbo.

Ang tanan mga empleyado nga nagtrabaho sa dakbayan sa Sugbo, gihatagan og 48 ka oras sugod karong adlawa aron nga modesisyon kon magpabilin kini sa dakbayan o mopa-uli na kini sa probinsya sa Sugbo.

“We will revert to Executive Order 17, effective Friday (Hunyo 26) we will have to revert to stricter border controls,” matod ni Garcia.

Sa sayo pa, si Secretary Roy Cimatu nagkanayon nga way ipatuman nga total lockdown sa dakbayan sa Sugbo sukwahi sa mga mikatap sa social media.

Si Cimatu ang miduaw sa Sugbo kagahapon, Hunyo 23, uban sa laing Cabinet members.

Gitahasan si Cimatu ni Presidente Duterte pagtabang sa dakbayan ug lalawigan aron maminosan kon dili man masugpo ang pagkatap sa makamatay nga virus.

Si Cimatu nga maoy nangulo sa Task Force mipahibawo nga personal nga moduaw ngadto sa mga barangay nga adunay daghang aktibo nga kaso ug makighinabi sa mga barangay kapitan. (dugang taho ni PAC)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph