ANG Austria na ang modumala sa Fiba 3x3 Olympic Qualifying Tournament, nga gisibog ngadto sa Mayo 2021.
Gipahibawo sa Fiba ang desisyon kagahapon, kon diin ang OQT ilusad ngadto sa Graz, Austria kay ang nasud modumala sa ilang pinakaunang 3x3 competition.
Ang Gilas Pilipinas 3x3, nga gilangkuban nila CJ Perez, Mo Tautuaa, Joshua Munzon ug Alvin Pasaol, maoy mobansiwag sa bandela sa Pilipinas kon diin makigtigi sa usa sa tulo ka mga puwesto nga ilugan sa OQT.
Nahan-ay ang Pilipinas sa Group C, kon diin makigharong kini sa Slovenia, France, Qatar ug Dominican Republic ug nagkinahanglan nga makatapos sa top 2 aron nga moabante sa playoffs kon diin magtakus ang 20 ka mga nasud.
Nasakmit na sa Japan, China, Russia, ug Serbia ang ilang mga puwesto sa inaugural men's 3x3 tournament sa Tokyo Olympics, samtang ang katapusang puwesto kay alang sa modaug sa Universality Olympic Qualifying Tournament sa Budapest.
Ang OQT orihinal nga nakatakda unta niadtong niaging Marso sa Bangalore, India una ang Covid-19 pandemic nagpugos sa Fiba nga ihunong ang kalihukan, ug unya ang Olympics isibog og balik sa 2021.