Delos Reyes: Bakuna sa Covid mosugot ka?

GIHUGNO sa coronavirus disease (Covid-19) ang ekonomiya sa daghang kanasuran; mga panimalay nagtiyabaw kay nahutdan na sa pagkaon labi na ang talad kan-anan sa mga kabus.

Madasig ang katawhan kung dunay madungog nga balita nga hapit na moabot ug madiskobre ang tambal uban ang handum nga malingkawas na sa pandemya ug makabalik na sila sa pagpanarbaho aron haw-ason ang pamilya sa kagutom nga nasinatian.

Atong nadungog sa makadaghang higayon gikan mismo sa baba sa atong Presidente Rodrigo Roa Duterte nga dili gyod siya mosugot mobalik sa mga eskwelahan ang kabataan hangtud walay vaccine nga i-bakuna kanila kontra niining Covid.

Enero 30, 2020, gimatuod sa Department of Health (DOH) dihang mibutho sa kalit ang maong sakit nga wala matino ang gigikanan ug ang hinungdan.

Apil ta sa pag ihap matag ang unang kaso sa Covid-19 sa usa ka 38 anyos nga babaye'ng Chinese ug ang mga Pinoy nagsugod pag ihap matag adlaw pila ang natakbuyan, pila na ang namatay, pila ang naka-recover sa tibuok kalibutan.

Nawala ang kompyansa sa katawhan bisan sa iyang silingan, dili na makiglamano, dili makigharong ug bisan makig-istorya kay basin dunay dala nga kagaw ug naglikay nga matakbuyan.

Sa ato pa, mga unom ka bulan palang ang pagkuyanap sa maong pandemya ug ang mga doctor naga paningkamot nga makamugna na og tambal tungod dili lalim ang gihatud nga kadaut sa katawhan.

Kung sa moabot nga mga adlaw, o duha ka bulan gikan karon, atong madungog nga duna nay vaccine nga iturok sa mga kabataan, mosugot ka ba kung usa sa turokan imong anak alang sa iyang kaluwasan?

Depensa kini nga dili na siya magkasakit pa o matakbuyan sa kagaw sa covid. Gikan sa kalisud sa pagkaplag sa tambal, ingon ana lang ka sayon ug mosalig naba kita nga walay kadaut o side effect ang masinati sa mga indiyeksyunan?

Sa akong yano nga pagsabot, mahimong kabahin lang sa eksperimento ang bisan kinsa nga ma bakunahan ug mahimong sorry nalang ugaling dunay motumaw nga mga side effects sa tambal sa umaabot nga mga adlaw.

Lunhaw pa sa panumduman sa katawhan ang daghang kabataan nga sa pagdahum nga ma proteksyonan kontra sa dengue, nangamatay na hinuon sa bakuna sa Dengvaxia.

Dili na mabalik ang kinabuhi nga mawala, mao nga dapat mag-maampingon ta. Unsaon nalang kung ipamugos sa mga doctor, mga BHW o sa gobyerno nga bakunahan ang atong anak labi na didto sa mga eskwelahan?

Atong ibalik kanila ang pangutana, kon duna silay anak, mosugot ba sila bakunahan? Tinuod ug hugot ba ang ilang pagsalig nga makaayo ug walay kadaut nga moabot, dala sa maong bakuna sa ulahing mga adlaw?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph