GIBUTYAG ni Davao City Mayor Sara Duterte-Carpio nga ang lokal nga panggamhanan maglimita sa ihap sa mga stalls (puwesto) ug mga maninda sa Roxas Night Market kung mabuksan kini og balik ngadto sa publiko.
Atol sa paghinabi sa 87.5 FM Davao City Disaster Radio kagahapon, Miyerkules, gikanayon ni Duterte-Carpio nga ang siyudad maggahin lang og limitado nga stalls subay sa "new normal" measure sa dakbayan.
"Expected gyud nga ing-ana na ang mahitabo because of the 'new normal' requirements nato of distancing," pagklaro sa mayor.
Apan iyang gigarantiya nga tanang mga maninda kansang operasyon termporaryong gipahunong, tugotan pa gihapon sa ilang puwesto, apan di sa samang higayon.
Tinguha sa mayor nga mahimong pamub-an ang panahon sa ilang operasyon pinaagi sa matag "batch" aron nga maakomodar ang dugang mga manindahay ug stall owners sa gilatid nga panahon.
Gimando sa mayor niadtong Marso 12, 2020 ang pagsira sa night market sa Roxas Avenue uban ang lain pang mga pampublikong parke human ang nasudnong gobyerno nagdeklara og state of public health emergency tungod sa hulga sa coronavirus disease (Covid-19).
Kapin sa 500 ka vendors ang naapektuhan sa pagsira, sumala sa mayor sa niaging taho.
Ang night market dunay 130 ka manindahay alang sa mga accessories, 130 alang sa mga ukay-ukay (RTWs), 116 food vendors, ug kapin sa gatusan ka mga massage therapists sa matag tulo-ka-bulan nga "shifting."
Diyutay nga puwesto sa maninda og pagkaon ug dry goods ang inisyal nga tugotan nga magbukas kung mangabri na ang maong dapit.
Kontrolahon sab nila ang ihap sa mga tawo nga tugtan sa pagsulod sa night market.
Mga naapektuhan nga vendors nalakip sa Tulong Panghanapbuhay sa Ating Disadvantaged/Displaced Workers (Tupad) program sa Department of Labor and Employment sud sa usa ka bulan.
Apan gitug-an sa mayor nga ang siyudad padayon nga magtabang kanila.
Giawhag sab sila ni Duterte-Carpio nga mo-aplay alang sa "cash for work" program, Work For Davao, sa siyudad nga nanginahanglan og gibanabana nga 42,000 trabahante.
Nagsilbi ang night market isip usa sa mga income generating operations sa dakbayan ug nailhang dayohan sa mga turista.
Kahinumdoman nga dunay pipila ka mga vendors sa niaging taho nga nabalaka bahin sa wa pa masayri kanus-a mobalik ang operasyon sa lugar nga usa sa ilang tinubdan sa kita.