PADAYON ang pagdaghan sa recoveries kun nangaulian sa coronavirus disease (Covid-19) kon itandi sa mga natakdan sud na ning upat ka mga adlaw nga nanglabay.
Base sa lista gikan sa City Health Department sa Miyerkules, Hunyo 24, 2020, adunay 65 ka mga naka-recover samtang 60 ang natakboyan.
Ang mga naka-recover gikan sa: Barangay Luz (2); Busay (2); Camputhaw (8); Capitol (11); Carreta (7); Hipodromo (1); Lahug (19); Mabolo (1); Pulangbato (5); Sambag I (1) ug Sambag 2 (8).
Dunay 11 nga nangamatay, walo niini niadto pang Mayo samtang ang tulo sa Hunyo.
Si Mayor Edgardo Labella nasubo gihapon sa resulta bisan kon nikunhod na ang natakboyan gikan sa kapin sa 100 matag adlaw sa miaging semana, sanglit aduna gihapoy mga kinabuhi nga nakalas.
Gumikan niini, padayon nga nanawagan ang mayor sa publiko nga magpabilin lang sa ilang tagsa-tagsa ka pinuy-anan.
Idili ang pagpasulod og mga bisita, mosunod sa social distancing, magsul-ob og face mask ug mosunod sa ubang mga protocol nga gipatuman sa Inter Agency Task Force (IATF) ug Department of Health (DOH). (PAC)