Badlungon, di mopatuo, dakpon

BADLUNGON una aron papaulion sa ilang tagsa ka balay.

Mao kini ang buhaton sa kapulisan nga gipakatap sa Dakbayan sa Sugbo sa mga tawo nga ilang maabtan sa kadalanan nga way pagtugot nga makagawas sa ilang balay taliwa sa gipatuman nga enhanced community quarantine (ECQ) protocol.

Ang gitugtan sa paggawas kadto lang mga tawo nga frontliner, sama sa mga doktor ug nurse, mga tawo nga naa sa essential nga sector, seguridad ug media.

Kay gikanselar man ni Mayor Edgardo Labella ang 250,000 ka quarantine pass nga giisyu sa Siyudad sugod sa Martes sa gabii, Hunyo 23, 2020, di na ilhon ang mga pass nga dad-on sa gawas.

Matod ni Police Colonel Cydric Earl Tamayo, officer-in-charge sa Cebu City Police Office (CCPO) nga ang tahas sa kapulisan karon nga ilang gipatuman ang paghatag og abiso sa katawhan sa kadalanan nga papaulion.

Apan kon kini di motuman sa pulis ug magmatinumanon sa ilang gusto, hayan adto sila sangko sa prisohan aron pasakaan og kaso.

“We are reminding them nga since cancelled pa ang Q pass, so wala pay gitugtan nga mogawas. If they will not listen to our policemen then we will bring them to the nearest police station and file a case against them,” pasabot ni Tamayo.

Ang CCPO nagmontar na og 13 ka mga checkpoint sa strategic nga mga dapit sa Siyudad sa Sugbo.

Dugang ni Tamayo nga ang tahas sa kapulisan mao ang pagpatuman sa mga protocol sa ECQ. Matod ni Tamayo nga ang CCPO nagpaabot pa sa unsay dugang kamandoan gikan ni Labella.

Ang Siyudad mogamit na sa QR code isip quarantine pass.

Nagplano kining moisyu og 100,000 ka QR code nga ipang-apod-apod sa matag panimalay sa mga barangay. (Lahi nga estorya sa pahina 2).

“Murag nakita nga daghan ra kaayo daw ang 250 mil nga quarantine pass. Bisan pa nga katunga niana ang manggawas, Mao na ang gi-evaluate karon,”dugang ni Tamayo.

KINSAY GITUGTAN

Dugang ni Tamayo nga ang gitugtan lang nga makagawas mao ang mga authorized person outside residence (APOR) sama sa mga medical personnel, mga sakop media, call center agents, kadtong mag deliver og essential goods.

Giawhag ni Tamayo ang publiko nga maminaw ug magpaabot lang sa desisyon sa kagamhanang lokal o sa Inter Agency Task Force (IATF).

Sa kasamtangan, mas maayo nga magpabilin nga magpundo lang una sa ilang pinuy-anan.

Samtang dugang pulis usab ang gibutang sa Dakbayan sa Sugbo aron sa pagtabang na sa pagpatuman sa ECQ.

Gawas sa kapulisan gikan sa Police Regional Office (PRO) 8, duna na say mga pulis nga gikan sa Bohol ug Siquijor ang nia dinhi. (BBT)