ANG magsusuwat nga si Miguel de Cervantes Saavedra, sa iyang nobela nga “Don Quijote,” niingon, “Wit and humor do not reside in slow minds.” Mao na nga daghan ang mga pasiaw sa legal profession nga giharian sa mga lantip og salabutan. Magpalahi ta karon ug lakbitan nato ang pipila sa mga pasiaw sa legal profession.
DI GANAHAN OG KAPE. Atol sa coffee break sa usa ka dakong law office, nisulod ang senior partner sa ilang conference room. Kay ngiob, iyang gipasiga ang suga. Maoy iyang nakita ang ilang sexy nga sekretarya nga nakighilawas sa ilang bag-ong abogado ibabaw sa conference table.
Senior partner: Ahaa, mao diay ni inyong coffee break.
Seksing sekretarya: Torni, pareho man gud ming duha nga di ganahan og kape kay makapanerbyos. Mao ni among painit.
NISAKA ANG CHOLESTEROL. Usa ka bana nidangop sa usa ka abogado kay magpaanular sa iyang kaminyuon kay nalisuan sa pangisip ang iyang asawa kay kada buntag moyaka ug maputak-putak nga morag himungaan nga nangitlog.
Abogado: Dugay na ning kahimtang sa imong asawa?
Kliyente: Dugay na, Torni. Mga lima na ka tuig.
Abogado: Nganong karon pa man ka magpaanular sa inyong kaminyuon?
Kliyente: Unsaon, Torni. Nisaka man ang akong cholesterol og kinaon sa iyang itlog.
FIRST TIME. Sa unang panahon, ang silot sa kamatayon pinaagi sa pagpunggot sa ulo. Ipatong sa konbiktado ang iyang liog sa tadtaran. Apan dihay konbiktado nga gihimong unlan ang tadtaran. Nasuko ang berdugo.
Berdugo: Tarantado. Ang imong liog maoy ipatong sa tadtaran.
Konbiktado: Sorry boss. First time pa ni nako.
WA MA-PROMOTE. Nakabantay ang huwes nga usa ka akudaso sa snatching kadaghan na magbalik-balik sa iyang korte.
Huwes: Ikaw akusado, sa pito nako ka tuig nga naglingkod ning maong korte, kalima ka na magbalik-balik dinhi sa kasong snatching.
Akusado: Tinuod na, Your Honor. Pero, ako diay imong basulon kon wa ka ma-promote?
WAY NGIPON. Usa ka abogado niretiro na sa pagpanglaban ug nag-alagad sa simbahan isip usa ka lay minister. Usa ka adlaw siya ang nagwali atubangan sa mga senior citizens ug ang iyang wali mahitungod sa adlaw sa paghukom, sa adlaw sa panudya.
Abogado nga lay minister: Mga igsuon ug mga tinubos ni Kristo, paghinulsol kamo sa inyong mga sala kay hapit na ang adlaw sa paghukom. Mokunsad ang mga anghel ug lainon ang mga dautan gikan sa maayo. Ang mga dautan itambog sa kalayo nga way pagkapalong. Magminatay sila sa paghilak ug magkagot ang ilang mga ngipon.
Kalit nga nibarog ang usa ka senior citizen ug niingon: Unya Torni, wa na man koy ngipon, wa nay magkagot?
Abogado nga lay minister: Huwat lang kay basin mahatagan kag pustiso.
Nindot pa unta kaayong ipadayon pero limitado ang atong espasyo. Di lang ta magpalabi. Hinuon, niingon ang pianista nga si Liberace, “Too much of a good thing is wonderful.” (edbarrita@gmail.com)