MAGTUTUDLO sa publikong tunghaan nadakpan sa buy-bust dihang nipalit og shabu sa iyang silingan mga alas 11 sa gabii sa Miyerkules, Hunyo 24, 2020 sa Barangay Poblacion Occidental, lungsod sa Consolacion.
Si Jedesteel Luvite Pernito, 46, nagpuyo sa nahisgutang lugar, nagtudlo sa Consolacion National High School.
Lakip sa napusasan ang target sa buy-bust nga si Rachel Bugtai, 31, dalaga street level pusher.
Si Major Verniño Noserale, hepe sa Consolacion Police Station nga nahinabi sa Superbalita Cebu, niingon nga nipalit og shabu si Pernito kang Bugtai.
Matod ni Noserale nga si Bugtai ilang gipalitag usa ka pakite sa shabu balor og P200. Dihang mitunol sa ilang poseur buyer, ilang gipusasan.
Naatol sab sa pagpalit ni Pernito hinungdan nga ilang giapil pagdakop ug ilang nakuhaan og usa ka pakite sa iyang possession.
Si Bugtai nakuhaan sab og laing usa ka medium nga putos nga shabu, P200 nga buy bust money ug P200 nga halin.
Matod pa ni Noserale nga ang drugas nga nakuha gikan kang Bugtai motimbang og 5.6 gramos, mobalor og P80, 080 base sa Dangerous Drugs Board (DDB) value.
"Ana siya nga pa bright daw niya ning shabu kay makatabang niya isip English teacher. Mo maayo daw siyag samot sa pag-English kon makasuyop," dugang ni Noserale.
Matod ni Noserale nga nisulti kanila si Pernito nga magluya siya kon di maka-shabu hinungdan nga bisan sa hulga sa coronavirus disease, milighot siyag palit. (GPL)