HINGPIT na nga nagnegatibo sa coronavirus disease (Covid-19) ang usa ka locally stranded individual (LSI) human sa ikatulong swab test nga nigawas niadtong Hunyo 24, 2020.
Nakagawas na sa ospital sa Northern Mindanao Medical Center (NMMC) ang 49 anyos nga babaye nga taga Barangay Kauswagan sa siyudad sa Cagayan de Oro.
Gibutyag ni Dr. Bernard Julius Rocha, Medical Specialist II sa NMMC, nga nagnegatibo na gyud sa severe acute respiratory syndrome coronavirus 2 (Sars-CoV-2) ang maong pasyente ug nagpasalamat kini gumikan kay nakagawas na kini sa ospital.
"Nigawas na gyud ang iyang result sa iyang re-swabbing yesterday which turns out negative," matud ni Rocha.
Ang maong pasyente na-admit sa NMMC niadtong Mayo 29, 2020 ug nakagawas sa ospital mga alas 12:15 sa hapon, Hunyo 25, 2020.
"She was swabbed three times. Ang first katong pag-swabbed sa iyaha katong nag positive dayon ang sunod nga swabbed niya was positive again and then mao man na ang last katong yesterday (Hunyo 24, 2020) was negative," dugang pa.
Anaa sa siyam ang natalang rekober sa siyudad sa 28 ka natalang positibong kaso ug kung ma-tag na kini nga rekober anaa na sa napulo ang mamahimong rekober sa siyudad.
Nasayran nga kini ang nag-inusarang Covid-19 patient nga nahabilin sa NMMC sa pagsulat niini nga balita ug karon nakagawas na sa ospital.