ANAA sa 28 ka mga Higher Education Institution (HEIs) sa Northern Mindanao ang nag-apply sa usbaw sa tuition bisan pa man sa padayong nasinatiang pandemya o krisis sa coronavirus disease 2019 (Covid-19).
Gipaniguro usab sa Commission on Higher Education (Ched)-Northern Mindanao nga ila una kining sutaon pag-ayo ug lauman nga makasunod gihapon kini sa bala-od sa dili pa mohatag og panugot sa maong aplikasiyon sa usbaw sa balayrunon sa tunghaan.
Gibutyag ni Raul Alvarez Jr., director sa Ched-Northern Mindanao, nga gimandoan na usab ang maong mga tunghaan nga magpahigayon og laing konsultasiyon sa ilang mga stakeholder.
"There were 28 schools that initially applied for tuition fee increase, so sa pagkakaron, gi-orderan sila nga mag re-consultation with their stakeholders," matud ni Alvarez.
Gidugang pa usab niini nga ang tinugyanan man sa tunghaan ug mga stakeholder ang mag-set sa tuition fee apan ang Ched pa usab gihapon ang magpatuman og regulasiyon ug gabayan.
"Basically kami sa Ched, we check only the appropriateness of all of those things. Basically pag-nag apply ang eskwelahan and concur na ang mga stakeholders niya kasagaran wala naman gasaba daghan because it's been agreed by all parties in the school. Nonetheless, it's still Ched that regulates that," dugang pa.
Sa pagkakaron, kasamtangan pa nga nagpahigayon ang mga tunghaan og konsultasiyon kalabot na sa maong hisgutanang pagpa-usbaw sa mga tuition fee.
Naglaom usab kini nga mahatag sa ila ang mga proposed tuition fees sa maong mga tunghaan aron nga magpahigayon og konsultasiyon sa mga stakeholders kalabot na usab niini.