DILI rebeldeng New People's Army (NPA) ang midagit sa duha ka mga political campaigners sa Banaty partylist niadtong Miyerkules didto sa Calinan, siyudad sa Davao, apan giingong mga kaalyado ni Mayor Rodrigo Duterte.
Kini ang pagtuo sa Bantay partylist nga girepresentahan ni Congressman Jovito Palparan ug Anad partylist nga girepresantahan ni Congressman Pastor Alcover Jr.
Ang duha ka mga kongresista maoy nangulo sa peace caravan ug indignation rally batok sa mga NPA nga gitambongan sa gatusan ka mga tawo didto sa Barangay Malabog, distrito sa Paquibato niadtong Sabado.
"As per raw information nga among nadawat, mora'g makatuo mi nga dili NPA ang ang midagit nila former kagawad Juliana Noquera ug Ronald Miranda. Mora'g naay involvement niini ang grupo ni Tata Sala nga supporter ni Mayor Duterte," ni Anad partylist spokesperson Art Tariman dihang nahinabi sa telepono sa Superbalita.
Sila Noquera (kanhi kagawad sa Barangay Dominga) ug Miranda gidagit sa wala mga armadong tawo sa 1:30 sa hapon niadtong Miyerkules didto sa Calinan Poblacion, siyudad sa Davao.
Si Noquera nakig-istorya sa usa ka wala maihing lalaki atubangan sa Fantasy Resto Bar nga nahimutang sa Mc Arthur Highway, Calinan Poblacion.
Samtang nag-istoryahanay ang biktima ug ang lalaki kalit miabot nga mga armadong tawo nga nagsakay sa usa ka pick-up nga dunay plate number LEX-714.
Si Noquera daling misakay og tricycle apan gisundan siya ug dihang miabot sila sa Felcris Supermarket gipugos siya pagpasakay sa sakyanan dayon mipaingon ngadto sa Bukidnon.
Isip reaksyon sa pasangil sa Bantay ug Anad partylist, si Mayor Rodrigo Duterte nagbutyag nga gimik ang gihimo nila Palparan ug Alcover.
Si Duterte nagbutyag nga layo sa kamatuoran nga siya nagpadagit sa duha ka mga biktima nga sila Noquera ug Miranda.
"Kung naa koy kidnapon, dili nang ultimo. Unsa may akong makuha sa ila? Gusto nakong kidnapon si Alcover ug Palparan. Unsaon man nang ultimo lang?," ni Duterte kinsa nahinabi sa local media uban ang Superbalita samtang nagsaulog sa iyang ika-65 nga adlaw'ng natawhan ilawom sa Bankerohan Bridge, Domingo sa gabii.
Sa pagsuwat ning balita, wala pa makuha sa Superbalita ang pahayag sa negosyanteng si Nelson "Tata" Sala nga gilambigit sa maong hitabo.
Sa laing bahin, malipayon nga nakigdungan sa pagpangaon ang gatusan ka mga bata ug molupyo sa Bankerohan Bridge kang Mayor Rodgiro Duterte kinsa nagsaulog sa iyang ika-65 nga adlaw nga natawhan niadtong Dominggo.
Si Duterte nagsaulog sa iyang simple nga birth day party uban sa iyang mga anak nga gipangulohan ni Bise Mayor Sara Duterte ug mga kandidato sa Hugpong sa Tawong Lungsod.
"Nasurprise mi ani nga celebration kay wala man mi nakabalo nga naay giandam si Councilor Edgar Ibuyan para kang Mayor," ni Bise Mayor Duterte kinsa nalipay nga daghan ang mga tawo nga miduyog kanila sa maong selebrasyon.
Malipayon kaayo ang katawhan sa maong lugar sanglit ilang nakauban ang mayor sa pagpangaon samtang gilingaw sila sa iladong komedyante nga si Norman Mitchell ug Magician James Infiesto. (AD)