NAKITA karon sa gobyerno nga dunay mokabat kapin kun kulang P250,000 annually, kita sa mga online sellers nga wala magbayad og income tax, busa mikisi-kisi ang gobyerno aron makuwartahan ang mga online entrepreneurs.
Gidukdok niini ang buhatan sa Bureau of Internal Revenue (BIR), busa ang BIR karon nagpagula og Revenue Memorandum Circular (RMC) 60-2020 sayo ning mga bulana.
Igking tawon ang mga gagmay nga online entrepreneurs kay dunay dakong purohan nga sila madamay gyud, diin gilayong namahayag, nga ginagmay lang sila, ug di sila angay madamay sa gigukod karon sa gobyerno nga dagkong digital entrepreneurs gumikan kay kini ang makaluwas sa ilang gastuhon sa matag adlaw diha sa pamilya luyo sa nagpadayong krisis nga dala sa coronavirus disease (Covid-19).
Gilayon sab nga gidepensahan ang mga online entrepreneurs ni Senator Risa Hontiveros diin suma sa senadora, “Kung hahabulin ng pamahalaan ang malalaking digital entrepreneurs, dapat siguraduhing hindi nito pahihirapan ang maliliit na online seller na dumidiskarte ngayon para kumita. Our revenue policies should be sensitive to the struggles of Filipinos trying to make ends meet in these difficult times."
Sa paggula sa pamahayag sa senadora dali kining mipagula sab og Senate investigation ngadto sa BIR diha sa tumong sa ahensya nga ang mga small-online sellers ipaubos na sa taxation ug registration requirements luyo sa Covid-19 pandemic.
Si Hontiveros nagduso og Senate Resolution No. 453, kinsa nanawagan sa Senado nga imbestigahan una ang may kalabotan sa RMC 60-2020 nga nag-order sa tanang online sellers sa pag-register sa ahensya ug sa pagbayad sa ilang buhis, apan ang senadora miduso og pagsuspenso sa pagbayad og buhis gumikan alang niya di kini maoy sakto nga panahon sanglit nagpait ang tanan gumikan sa pandemya.
"Magulo at mahirap sundin ang BIR memo, lalo na't paiba-iba ang sinasabi ng mga ahensiya ng pamahaalan ukol dito. It is best for everybody's interests if the BIR suspends the implementation of the memo until December 31, 2020, while government agencies review and craft better policy guidelines on how online entrepreneurs should register or pay taxes," ingon ni Hontiveros.
Husto baya ang senadora. Di kini maoy panahon sa pagduot sa mga Pilipino nga pugsanon nga manubag sa buhis. Unta kini ang husto nga panahon sa pagtinabangay. Human sa pandemya, diha ang haum nga takna aron motubag ang Pilipino sa iyang obligasyon sa gobyerno.