Davao 'di pa andam' sa online classes
GIANGKON sa National Telecommunications Commission (NTC)-Davao nga ang rehiyon di pa andam alang sa online classes isip usa sa Learning Delivery Modalities sa School Year 2020-2021, tungod sa lanay nga connectivity sa pipila ka lugar sa banikanhon ug kawalay cell towers nga magagikan ang signal.
Gikanayon ni NTC Davao Regional Director Nelson Cañete sa virtual presser sa Miyerkules, Hunyo 24, nga ang ilang buhatan, uban sa Department of Information and Communications Technology (DICT), naningkamot nga makig-alayon ngadto sa Department of Education (DepEd) aron nga masayran kon unsay haum nga "bandwidth" nga gikinahanglan alang sa online class.
“Sa hisgutanan nga ready, dili gyud ready kay tungod wala man gyud ta katag-an nga naa diay ni si virus rong panahona. In fact wala pa si virus, may problema na ta sa atong connectivity,” tin-aw ni Cañete.
Ug tungod sab sa pandemic, nitaas sab ang gamit sa internet.
“Pero kon kining mga areas sa mga Poblacion, or sa mga downtown areas, kaya nila masuplayan sa atong mga telcos ang ilang need," puno ni Cañete.
Nasubo sab siya sa mga kompaniya sa telecommunication kon nganong way mga cell towers ang pipila ka mga lugar sa kabanikanhan nga obligasyon sa telcos ilawom sa ilang prangkisa.
"Sa mga bukid ang atong problema. Usahay kapila na namo gipatawag ang mga telcos among giingnan nga sigon sa franchise sa telco nga supplayan niya ang tibuok bahin sa Pilipinas mao nangutana bitaw ko kanang bukid sa Nabunturan, dili na ba na sakop sa Pilipinas?" pangutana niya.
Matud niya nga ang lanay nga connectivity mahimong matubag kon dunay kooperasyon ang komunidad. Pananglitan, atol sa tingtrabaho o tingklase, kinahanglan nga minosan sa publiko ang paggamit sa apps aron nga hatagan og dalan ang edukasyon ug trabaho sa mga buhatan.
“Kanang bandwith nga available ana, ihatag nato na para sa educational needs ug kining sa mga government offices. Bisan gani imong cellphone wala nimo gigamit kung naka-online ka nagakaon na siya og bandwidth," esplikar niini.
Hinuon matud sa NTC regional director naa nay mga signal ang mga lugar sa siyudad kay uban mga telcos naa na sa proseso sa pagpalapad.
Apan dunay mga problema kay ang ilang aplikasyon naa pa sa local government units (LGUs). Ang uban nakaung-ong pa ang pag-aproba sa ilang aplikasyon alang sa pagtukod og mga towers.
“Gusto sila mag-expand pero naay problema sa mga applications. Ang uban pending og one year na, ang uban pending og two years na so dili sila makatukod og tower hangtod dili approve ilang mga permit,” saysay ni Cañete.
Mangilabot lang ang NTC kon duna nay pagtugot aron susihon kon nagsunod ba sila sa NTC standard may kabahin sa pagpalit og mga kahimanan.