GIDAKOP sa traffic enforcer ang usa ka tawo nga nag-drive og motorsiklo kay wa magsul-ob og helmet. Traffic enforcer: “Nakahibawo na ka nga compulsory ang pagsul-ob og helmet. Pagkaghi gyud nimo’g ulo.” Driver: “Mao bitaw nga wa ko magsul-ob og helmet kay gahi ko’g ulo.”
Mao kana nga gibalik ang Cebu City sa enhanced community quarantine (ECQ) tungod sa padayon nga pagsaka sa mga kaso sa Covid-19. Si Presidente Rodrigo Duterte mismo, usa ka Cebuano, niprangka nga tungod ni kay ang mga Cebuano “mga gahi mo’g ulo.”
Hardheaded ug complacent. Gibaliwala lang ang coronavirus. Mao nga gipadala sa Presidente dinhi sa syudad si DENR Secretary Roy Cimatu, usa ka heneral, aron mangulo sa anti-Covid-19 task force sa syudad.
***
Niabot sa pangulo ang mga taho nga morag lang og way ECQ sa Cebu City. Daghan gihapong mga tawo nga nagsuroy-suroy nga mora la’g way coronavirus. Daghan ang nagpadagan sa ilang mga motorsiklo didto sa Talisay City.
Apan di ba daghan ang manggawas nga ang gobyerno sa syudad niisyu man og 200,000 ka mga quantine pass. Kadtong nakadawat niini nagtuo nga makagawas sila sa ilang panimalay. Lalim ka kon manggawas ang 200,000. Ikomparar na sa populasyon sa syudad nga mokabat sa usa ka milyon.
Mao kana nga gikanselar ni Cebu City Mayor Edgardo Labella ang mga quarantine pass sa syudad nunot sa mando ni DILG Secretary Eduardo Ano. Moisyu ang syudad og bag-ong mga quarantine pass pero 100,000 na lang.
***
Unsa ka grabe ang mga kaso sa Covid-19 sa syudad sa Sugbo? Ning atong pagsuwat, miabot na sa usa ka gatos ang nangamatay sa Covid-19 sa syudad, sigun sa Cebu City Health Department. Ang positibo sa Covid-19 niabot sa 4,539, apan ang 2,242 nahimong negative, busa 2,197 na lang ka mga kaso ang aktibo.
Si General Cimatu, ang nakapalimyo sa Boracay Island nga gihulagway kaniadto nga lunangan sa hugaw sa tawo, niingon nga di siya mobiya sa Sugbo kon di mokunhod ang mga kaso sa Covid-19. Ang atong mahimo mao ang pagtuman sa mga lagda sa ECQ.
Way ganahan sa lockdown. Bisan ang Presidente di ganahan niini. Matod pa niya, “I really don’t want this lockdown. I hate it. I do not want even myself. But just what I’ve said, if you can’t bear it and you’ll be infected, sorry for you.”