MAG-UUMA nga nabilanggo sa kasong murder niadtong 2019 apan nakagawas patay nga napalgan gawas sa iyang pinuy-anan sa alas 6:30 sa buntag sa Sabado, Marso 13 sa Sitio Camansiles, Brgy. Cabadiangan, lungsod sa Balamban.
Si Jeffrey Jose Codoy, 50, minyo, nag-ubo na sa yuta dihang nakaplagan sa iyang kabanay.
Gituohan nga ang mga mamumuno nagsakay og motorsiklo nga nadunggan lang sa kabanay ang andar sa daling pagsibat human sa mga buto sa armas.
Si SPO3 Benedicto Bobilles, imbestigador sa Balamban Police Station nga nahinabi sa Superbalita Cebu, nagkanayon nga si Codoy nag-inusara sa iyang balay human gibiyaan sa iyang asawa ug mga anak.
Matod pa ni Bobilles nga katapusan nga nakit-an si Codoy nga nag-inom sa tabo sa ilang lugar alas 5:30 sa hapon sa Biyernes ug nipauli mga alas 7 sa gabii.
Ang uyoan nitug-an sa kapulisan nga alas 9:30 sa gabii sa Biyernes, Marso 12, 2021, nakadungog siyag sunod sunod nga buto sa armas.
Dayon dunay motorsiklo nga nagdalig biya sa maong dapit.
Wa na siya mogawas sa ilang balay sa kahadlok kay ngitngit ang palibot.
Pagmata niya nianang pagkabuntag, manglawog na unta siya sa mga binuhing manok dihang iyang nakit-an sa uyoan si Codoy na patay na ug nagkadugo.
Si Bobilles nagkanayon nga si Codoy nakagawas sa bilanggoan niadtong 2019 human pasakai og kasong murder.
Samtang naa usab siyay kasong rape, apan wa mohatag si Bobilles og mga detalye.
Matod ni Bobilles nga gihulagway nga maldito si Codoy ug giingon mangulata sa asawa ug magpabuto sa iyang armas kon mahubog. (GPL)