NATIBWAY ang kinabuhi sa usa ka lalaki human siya gipatay sa kalive-in partner sa babaye nga iyang gikadulog human sila nasakpan sa akto nga naghilawas didto sa Purok 9, Sityo Sugod, Barangay Union, lungsod sa Monkayo, Compostela Valley province.
Ang biktima nailhan nga mao si alyas Felmar (apelyedo gipugngan aron mapanalipdan ang dungog), samtang ang suspek mao si Glenn Francis.
Sumala sa report gikan sa Comval Province Police Provincial Office nga pasado alas 11:00 sa buntag niadtong Sabado, naabtan sa suspek ang biktima sulod sa usa ka panimalay didto sa Purok 9 samtang nakighilawas sa iyang live-in partner.
Giingong sirado ang pultahan sa lawak diin nagkumbati ang biktima ug ang kaipon sa suspek hinungdan nga gipugos sa suspek sa pagguba ang pultahan aron siya makasulod.
Naaktuhan gyod sa suspek ang gihimo sa biktima ug sa iyang kaipon hinungdan nga mingitngit ang iyang panan-aw ug nadunggaban niya ang biktima.
Nabulit sa mga samad dinunggaban ang lawas ni alyas Felmar nga miresulta dayon sa iyang kamatayon.
Ang suspek dali sab nga nasikop sa mga mirespondeng pulis.
Narekober sa mga otoridad ang kutsilyo nga dunay gitas-on nga 6 ka pulgada gikan sa eksena sa krimen.
Gitanggong na karon sulod sa selda ang suspek samtang giandam na ang kasong ipasaka batok kaniya. (Marvin Pineda)