Serna: Megastar nanalipod lang sa anak
DUNAY basehanan si Sharon Cuneta sa ‘pag-ulbo sa iyang kaspa’ aron paglaban sa iyang anak dalaga nga si Frankie.
Laliman ka ba nga hulga-on ang imong anak nga lugoson?
Bisan kon sa social media lang kini gihimo ug di sa linawas, maka-apekto gihapon kini sa huna-huna ug pagbati sa mga hingtungdan ug makausab sa dagan sa adlaw-adlaw nga pagkinabuhi.
Sa akong nahibaw-an, gisubay na sa mga awtoridad kon kinsa gyud ang tawo nga nag-post sa maong hulga.
Hinaut nga mahatagan og hustisya si Frankie ug ang iyang pamilya.
***
Alang nako, di maayong pagkapili si Sharon Cuneta nga maoy nikanta sa Kapamilya Forever nga jingle sa ABS-CBN.
Maayo man pagkakanta sa Megastar sa maong kanta pero morag di haom nga siya ang mohimo niini.
Nahinumdom mo nga nibiya man si Sharon sa Kapamilya Network ni-adto ug nilayat ngadto sa TV5 parehas ni Aga Muhlach.
***
Mo-andar gyud ang akong pagkasupakero o ‘rebelde’ matag karon ug unya. Dugay nang duna koy Mobile Legend app sa akong cellphone pero wa gyud nako gamita aron lang mosunod sa uso.
Karon, pwerte nang daghana sa akong mga Facebook friends ang nisunod sa uso ug nigamit sa face app aron makita kon unsay ilang hitsura kon mababaye o malalaki sila.
Sa makausa pa, wa na sab ko mosunod sa bul-og sa uso. Bahala nag ako ray nahibilin. Ngano diay?
Giingong dunay pahimangno ang NBI bahin niini. Nakakita usab ko sa telebisyon diin gituki kining maong app.
Matud sa giinterbyu, may kahigayunan nga gamiton ang hulagway sa mga nihatag niini (aron magamit sa pag-usab sa ilang hitsura ngadto sa pagkababaye o pagkalalaki ba) sa bisan unsang paagi nga way pagtugot sa tag-iya.
Layo man tingali sa tinuod, pero bentaha ang mag-amping
***
Nawingig mo, mga Cebuano, sa gisulti ni Presidente Rodrigo Duterte nga kita “gahi’g ulo?” Sakit no? Mao nay giingon nga: ‘Truth hurts’ sakit ang kamatuoran.
Naa sab baya’y basehanan si Presidente Digong. Alams na, matud pa, bale wake up call to nato.
Gisigingsiging ta aron makamata ug maka-amgo sa kamatuoran.
Hinaut nga mag-usab ta ug motuman sa mga lagda, di lang aron mausab ang pagtan-aw ni Presidente nganhi nato, kon di alang usab sa atong kaayohan.
Aron maduol-duol sab ta sa gitawag nga new normal bisan lahi ra gyud kini sa naandan natong normal kaniadto.