ADUNAY pipila ka mga nasud ang nagsugod na sa pagpahigayon og trials/test o eksperimento sa ka-epektibo sa namugna nga bakuna batok sa coronavirus disease ngadto sa lawas sa tawo.
Taho sa BBC nagkanayon nga ang United Kingdom (UK) nagsugod na sa pag-immunized og mga volunteers sa namugna nga anti Covid-19 vaccine.
Gibana-bana nga adunay 300 ka tawo ang mopa-ubos sa maong ‘human trials’ sa umaabot nga mga semana nga gipasi-ugdahan sa Imperial College London.
Una nang gihimo ang animal test ug gihulagway nga nagmalampuson sa dihang nasuta nga luwas ug epektibo ang resulta sa maong bakuna sa immune system diha sa hayop sa pakigbatok sa virus.
Mi-volunteer
Usa ka 39 anyos nga babaye ang nalakip sa unang batch nga mibolontaryo alang sa maong human trials sa Imperial College London.
“I think it came from not really knowing what I could do to help, and this turned out to be something that I could do.
“And understanding that it’s not likely that things will get back to normal until there is a vaccine, so wanting to be part of that progress as well,” saysay sa maong volunteer sa interview sa BBC.
Human sa unang phase sa maong trial laing test ang gikatakdang ipahigayon sa buwan sa Oktubre nga magkinahanglan og 6,000 ka tawo.
Ang team sa mga eksperto sa Imperial College nanghinaot nga ma-apod ang maong bakuna lukop sa UK ingon man ngadto sa ubang nasud alang sa maong katuyoan.
Brazil
Sa nasud sa Brazil, ang ilang mga researcher ang mi-experiment na sab sa maong anti-oronavirus vaccine nga ginama sa Oxford University, Federal University sa Sao Paulo sayo ning semanaha.
Ang maong bakuna ginganlan og ChAdOx1 nCoV-19 susama sa bakuna nga gi-test didto sa UK.
Mga volunteer nga nag-edad gikan sa 18 ngadto na sa 55 anyos nga nagsilbing frontliners nga nagtrabaho sa Sao Paulo – UNIFESP Hospital ang maoy gipa-ubos sa unang batck sa testing sa maong bakuna.
“Researchers began triaging volunteers Saturday (Hunyo 20) following the protocols established for the study. Participants must test negative for SARS-CoV-2, the virus that causes COVID-19.
“Starting Tuesday (Hunyo 23), volunteers with a negative blood test were administered the vaccine,” natala sa statement sa Oxford University.
Napili-an ang nasud sa Brazil sa maong ‘human trial’ gumikan sila maoy gihulagway nga second-highest caseload sa mga nangamatay human nga ilang gisundan ang America.
Mitala ngadto sa 1.1 million ka tawo ang nagpositibo sa Covid ug 52,000 ang nangamatay sa maong nasud resulta sa pagkatap sa virus, taho gikan sa Agence France Presse (AFP).
South Africa
Susama sa Brazil niadtong Hunyo 23 gisugdan na sab didto sa Johannesburg, South Africa ang maong vaccine trials.
“We began screening participants for the South African Oxford 1 COVID-19 vaccine trial last week, and the first participants will be vaccinated this week,” pulong pa sa University of Witwatersrand (Wits) vaccinology professor nga si Shabir Madhi, atol sa virtual press conference, taho sa AFP.
President Duterte
Niadtong Lunes, Hunyo 22 gi-anunsiyo ni Presidente Rodrigo Duterte nga aduna nay bakuna nga namugma gikan sa laing nasud nga gila-uman nga makigbatok sa Covid-19.
“We believe, and I believe too, that many countries has now perfected some vaccine. Maybe some are haphazard kasi madalian (because they were done in a hurry). The quest for vaccine takes time, years. Dito nagmamadalian (They did it in a hurry) at least we have a medicine that would fight COVID,” tipik sa pamahayag sa presidente atol sa iyang pakigtagbo sa cabinet secretaries.
Ang Pilipinas mosalmot sa “Solidarity Trials” nga gipasiugdahan sa World Health Organization aron masuta ang ka-epektibo sa maong bakuna.
Nasayran nga adunay 288 ka pasyente ang mipadayag nga moboluntaryo sa maong vaccine trial.
Gitinguha sa WHO nga adunay 5,000 ka tawo gikan sa nagkadaiyang suok sa kalibutan ang mopa-ubos sa maong ‘human trial’ nga maoy ilang global target sa gidaghanon sa mga volunteer.
Base sa labing uwahing talaan sa WHO moabot ngadto sa 9.2 million ang global confirmed cases sa Covid-19, mitala na ngadto sa 477,807 ang nangamatay ug adunay 4.6 milyones ang nanga-ayo sa tibuok kalibutan.