Gamay na lay milapas sa ECQ

MAS ubos ang gidaghanon sa mga tawo nga nakalapas sa enhanced community quarantine protocol sa Hunyo 24, 2020.

Ubos kaayo kini itandi gikan niadtong Hunyo 15-23, diin kapin sa 1,000 ang ilang nadakpan.

Matag adlaw, 100 ngadto sa 200 ang ilang masikop nga mga malapason sa ECQ.

Kini maoy gipahibawo ni Police Colonel Cydric Earl Tamayo, officer-in-charge sa Cebu City Police Office (CCPO) sa pakighinabi sa mga tigbalita.

Matod ni Tamayo nga moabot lang sa 72 ka mga tawo ang ilang nadakpan niadtong Miyerkules.

Sa 72 ka mga milapas samtang naglatagaw sa kadalanan, 20 kanila gikuhaan og quarantine pass, 28 naisyuhan og traffic citation ticket, 15 gibadlong sa paglapas sa coding scheme, pito sa speed limit, liquor ban ug duha sa social distancing.

Matod ni Tamayo nga kasagaran sa mga na hold nagpangidaron og 20-30 anyos.

“We gave them awareness. Kon mga gahig ulo, atong dalhon sa police station and may face charges,” bahad ni Tamayo.

Ilang nakita ang kaepektibo na sa gipangbutang nga mga checkpoint.

“Kining mga nadakpan mao ning mga badlungon nga lipaton lang ang mga pulis. Nagtuo siguro sila nga usa lang ka checkpoint, apan pag abot sa laing checkpoint didto na masakpan,” dugang ni Tamayo. (BBT)