SUGOD kagahapon, Abril 24, 2020, wan a pasudla ang mga empleyado sa exempted nga mga establisimento nga way gikapakita nga identification card (ID) nga giisyu sa Kagamhanan sa lalawigan sa Sugbo.
Kini maoy unod sa kamandoan nga giluwatan ni Gobernador Gwendolyn Garcia nga mao ang Executive Order (EO) No. 5-Q-1.
Matod ni Garcia nga ang ID nga giisyu kinahanglan nga may control number, makita usab ang lagda sa Gobernador, sa Provincial Administrator og Chief of Staff ni Garcia.
“...with a warning nga ma effective na ra ba ni, kini nga executive order, effective by 12:01 Friday and if you still have not submitted, your employees will not be able to cross borders, both borders sa Talisay, gikan sa Cebu City ug border sa Cebu City ngadto na sa Mandaue”,matod ni Garcia sa Huwebes, Abril 23, 2020.
Ang maong ID Pass balido lang sa pagsulod sa Cebu City paingon na sa lokal nga kagamhanan kon asa nagpuyo ang maong indibidwal.
Dili pasabot nga kon naghupot ang usa ka empleyado sa kaong pass, makalusot na kini sa tanan nga agianan.
“Ang basic principle ani is ang gihangyo sa mga opisina nga located sa Cebu City nga maallowed anb mga empleyado gikan sa Probinsya ug lain nga lungsod nga maka report for work dinhi sa Cebu City ug makauli. Ang validity ani is from his home to Cebu City and back to the LGU he belongs”, matod ni Garcia.
Base sa lista nga gisumiter sa pangagamhanan, 16 ka mga government agencies na ang nakasumiter sa lista sa mga empleyado nga motabok sa borders. Sa kinatibuk-an may moabot 2, 165 ka empleyado ang gilakip sa lista sa mga kompanya. (ANV)