SA BUWAN lang sa Mayo niabot sa dul-an 160,000 ka mga kawani sa Central Visayas ang apektado sa flexible work arrangement, temporary closure, retrenchment/reduction of workforce, ug permanent closure.
Mao kini ang labing daghang kawani nga natala sa Department of Labor and Employment (Dole) 7 nga apektado subay na usab sa krisis sa Covid-19.
Sa maong datus anaa sa 5,638 ka mga establisyemento ang apektado.
Alang sa buwan sa Mayo aduna’y duha ka establisyemento ang permanente nga nanira diin 40 ka kawani ang apektado niini.
Niabot usab sa 69 ka establisyemento ang natala sa Dole 7 nga nag-retrench o nanangtang og kawani diin niabot sa 930 ka kawani ang apektado.
Samtang labing daghan ang apektado sa flexible work arrangement ug kining temporaryo nga nanira niadtong buwan sa Mayo diin niabot kini sa 5,567 ka mga establisyemento ug 158,120 ka kawani ang apektado.
Sa buwan sa Abril natala usab ang kapin 50,000 ka kawani nga nawangtangan og trabaho subay niining Covid-19.
Alang sa permanente nga nanira niadtong Abril anaa kini sa usa ka establisyemento diin 16 ka kawani ang apektado.
Niabot usa sa 12 ka establisyemento ug 232 ka kawani ang apektado sa retrenchment/reduction of workforce.
Samtang niabot sa 2,429 ka establisyemento ug 50,434 ka kawani ang apektado sa flexible work arrangment ug temporary closure sa rehiyon niadtong Abril.
Minus hinuon ang apektado nga kawani sa buwan sa Marso dihang nagsugod ang quarantine classification sa mga dapit sa rehiyon.
Anaa sa tulo ka establisyemento ang permanente nga nanira diin 27 ka kawani ang apektado.
Samtang anaa sa 32 ka establisyemento ug 224 ka kawani ang apektado sa retrenchment o kining reduction sa workforce.
Niabot usab sa 1,132 ka establisyemento ug 39,450 ka kawani ang apektado sa flexible work arrangement ug temporary closure sa buwan sa Marso.
Sumatotal alang sa tulo ka buwan moabot sa 9.247 ka establisyemento ug 249,473 ka kawani ang apektado ang trabaho dihang miigo ang pandemic sa rehiyon.
Wala hinuon gi-detalye sa Dole 7 kon pila niini ang matag lalawigan apan sagad niini nga apektado anaa sa Sugbo. (HBL)