IHATAG na karong adlawa, Hunyo 26, ang kapin sa 100,000 QR Code ngadto sa mga barangay captain isip hulip sa quarantine pass nga gikanselar sa Cebu City Government.
Ang mga QR Code maoy magsilbi nga passes sa mga representante sa matag panimalay nga mopalit sa essential goods.
Ang mga QR Code holder gitugotan lang nga makagawas katulo sa usa ka semana samtang padayon pa nga ilawom sa enhanced community quarantine (ECQ) ang Dakbayan sa Sugbo.
Ang mga QR Code nga adunay odd number sa katapusan sama sa 1,3,5,9 makagawas sila sa Lunes, Miyerkules ug Biyernes samtang sa even number sama sa 0,2,4,6,8 sa Martes, Huwebes ug Sabado.
Sa Dominggo walay gitugotan nga makagawas, gawas lang sa mga authorized person outside residence (APOR) nga gipahaom sa no-vehicle sa Dominggo.
Ang Carbon Market inay Lunes ang way baligya, karon ibalhin na usab kini sa Dominggo.
Ang mga personnel sa Office of the Mayor maoy mohatod sa mga QR Code ngadto sa tagsa-tagsa ka mga barangay hall ug itugyan ngadto sa mga barangay kapitan. (PAC)