MOABOT na ngadto sa 25 ka mga kaso sa sunog ang natala sa Cagayan de Oro Central Fire Station (COCFS) diin 14 niini structural fire ug 11 ang grass fire ning bulan lamang sa Marso.
Si City Fire Marshal Benigno Amomonpon sa BFP nibutyag sa Sun.Star Superbalita nga misaka ang kaso sa sunog tungod sa nasinating kainit bunga sa El Ni¤o ug ingon man sa nagpadayong rotating brown-outs ning siyudad.
Nasayran gikan niini nga moabot na ngadto sa P7 milyones ang natalang danyos sa tanang sunog nga natigayon ning siyudad sugod lamang sa bulan sa Enero hangtod ning bulan sa Marso. Kini nga gidaghanon nidoble kong itandi niadtong nilabayng tuig nga moabot lamang sa kapin P2 milyones.
"We cannot fight against nature but we can prevent," kini ang kanunay nga pamahayag ni Amomonpon. Prevention pinaagi sa paghatag og seguridad kalabot sa sunog.
Usa sa gihatag nga pananglitan niini labina nasinati ang rotating brownout ang malimtan nga pagpalong sa suga o gidagkutan nga kandila tungod kay dili naman kini mamatikdan labina sa pagbalik sa kuryente, kini possibleng hinungdan sa pag-ulbo sa kalayo.
Lakip nga hinungdan ang faulty wiring, electrical overloading ug ang nag-overheat nga mga appliances ang usa sa komon nga hinungdan sa pag-ulbo sa kalayo
Nagtuo si Amomonpon nga hangtod dili matapos ang nasinating rotating brownouts ug kainit sa panahon adunay posibilidad nga mosaka pa ang kaso sa sunog hinungdan nga gipanawagan ang katawhan nga magbinantayon.
Siguraduhon lamang nga naibot ang mga appliances sa dili pa molakaw sa puloy-anan. Giawhag ang katawhan nga magsubay sa gihatag nga kampanya kalabot sa paglikay sa sunog.
Kahinunduman nga ning uwahi duha ka dakong sunog ang miulbo sa Brgy. Cugman ning siyudad nga mitala og milyones nga danyos.