Teen Romance: You make me cry

Teen Romance: You make me cry

(Katapusan sa pito ka mga gula)

Kalit kong gibunlot ang akong bukton nga gikuptan ni Paolo.

“Gibugal-bugalan ba ko nimo, Paolo?”

Nakahilak gyud ko sa kahiubos. Morag gusto kong ipagawas ang tanan kong kaguol sa atubangan ni Paolo. “No, Jona. Di ko makahimo sa pagbugal-bugal nimo because I love you!”

Misiga ang akong mga mata sa grabeng kasuko. Gitulisok ko si Paolo nga ning higayona nagtindog na sa akong atubangan.

“Lumpungon mi nimo si Jermaine? Shit ka, Paolo!”

Nadako na gyud ang akong tingog. Hapit ko na lang iduot ang akong tudlo sa agtang ni Paolo. Ug nakalitan gyud ko kay kalit kong gigakos ni Paolo. Wa ko makalihok kay hugot ang iyang paggakos nako. “Nagsulti ko sa tinuod, Jona. Love tika. Ug wa mi relasyon si Jermaine.”

Morag nanlumoy ko sa paggakos ni Paolo nako. Morag gusto kong motuo sa iyang giingon. Hinay kong gitulod si Paolo. Nagpamahid ko sa akong mga luha nga milingkod sa taas nga sopa. Mitapad paglingkod si Paolo nako.

Unya nakalingi ko kay nahiabot si Jermaine. Wa gyud ko makasabot sa sitwasyon. Nganong nia si Jermaine?

“Tinuod nga love ka ni Paolo, Jona. Pero naglisod siya sa pagsulti nimo ani kay iyang namatikdan nga lesbian ka. Kanunay siyang nagpangayog tambag nako ug moadto siya sa balay panagsa labi nag gabii. Wa mi relasyon. Sa among kasuod, ordinaryo na lang namo ang pagkuptanay sa kamot.”

Nahilom ko. Unya nananghid na si Jermaine nga mopauli. Gusto niya nga magkaestoryahay mi si Paolo pag-ayo.

Nagkatinan-away mig dugay si Paolo. Mi-smile siya. Naka-smile sab ko. “Di ko tomboy, no, Paolo. Tinuod kong girl. Gipahilak mo ako, Paolo.”

“Sorry nga nahitabo kana, Jona. Pero sa laing bahin, nakaayo sab kini nimo, ug nako.”

“Ngano man kuno, bi, Paolo?”

“Kay imong nahibaw-an nga di ka tomboy.

Usa ka hapon nga dako ang hunas sa dagat sa among lugar, nagkuptanay mi si Paolo sa kamot samtang nagsuruy-suroy sa hunasan. Unya didto sa unahan, nanginhas si Jermaine. Miwara-wara siya sa iyang kamot kanamo ni Paolo. Mibawos sab mig wara-wara niya. Malipayon kaayo mi si Paolo. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph