GISUGDAN na sa Philippine Sports Commission (PSC) ang paglusad og Covid-19 swab tests alang sa ilang empleyado kinsa kabahin sa ilang skeleton workforce sa Rizal Memorial Sports Complex (RMSC) sa Manila niadtong Huwebes.
Gipahimutang sa PSC Medical Scientific Athletes Service (MSAS) Unit ang swabbing sa gawas lang sa administrative building sa maong ahensiya.
Apil sa mga empleyado nga gisusi mao ang mga security personnel ug medical staff sa ahensiya.
"This is one of the efforts of the PSC in ensuring the safety of our employees," tin-aw ni MSAS official Ellen Constantino.
Gisulti sa PSC nga magsusi sila sa 100 ka personahe sa Rizal hangtud sa Lunes, Hunyo 29. Molusad sab sila og 50 swab tests sa PhilSports Complex sa Pasig kagahapon, Hunyo 26, naglakip sa nahabiling 18 athletes ug 4 coaches sud sa PSC dormitory.
Niadtong Hunyo 9, ang Ninoy Aquino Stadium (NAS), usa sa mga pasilidad sa PSC gihimo nga "We Heal as One Centers" alang sa mga pasyente Covid-19, nagpagawas na og 123 nga pasyente ug way natalang namatay. (MLSA)