MIABOT sa Biyernes sa ala 1 sa hapon, Hunyo 26, sa Dakbayan sa Sugbo ang 150 ka mga sakop sa elite force sa Philippine National Police (PNP), ang Special Action Force (SAF).
Ang tropa gikan pa sa Camp Crame sakay sa offshore patrol vessel (OPV) BRP Gabriela Silang nga midunggo sa Malacañang sa Sugbo.
Ang BRP Ganriela Silang maoy labing dako nga barko sa Philippine Coast Guard (PCG) nga napalit gikan sa France.
Sila gibutang sa covered court sa Barangay Tisa, Dakbayan sa Sugbo.
Ang SAF gipangulohan ni Police Major Rene Joy Mosquiza.
Gidugang sila sa pwersa sa kapulisan sa dakbayan taliwa sa enhanced community quarantine (ECQ) nga gipatuman sugod niadtong Hunyo 16.
Duna nay dugang mga pulis nga gibutang dinhi sa Dakbayan nga gikan sa Police Regional Office (PRO) 8, Bohol ug Siquijor. Tutokan sa SAF 12 ka mga barangay sa siyudad nga dunay labing taas nga mga kaso sa Covid-19.
Gibutyag ni Police Colonel Cydric Earl Tamayo, officer-in-charge sa Cebu City Police Office (CCPO) nga ang SAF motabang sa kapulisan sa pagpatuman sa ECQ protocol.
Sila usab ang motabang sa pagbantay sa mga nag unang checkpoint nga gimontar sa mga nagkadaiyang dapit sa dakbayan.
Tahasan usab sila sa pagpatrolya sa mga barangay nga taas og mga kaso sa Covid-19.
Usa ka kasaligang tinubdan niingon nga duna pay dugang mga SAF trooper nga moabot nga magdala og mga armored asset sama sa armored personnel carrier (APC).
2 KA COMPANY
Si Police Brigadier General Ignatius Albert Ferro, pangu sa kapulisan sa Central Visayas nga nahinabi sa Superbalita Cebu, niingon nga ang SAF gilangkuban sa duha ka mga kompaniya.
“We have now a full compliment of two companies ng SAF na binibigay ng ating national headquarters. They are here to implement the law,” matod ni Ferro.
Dugang ni Ferro nga dunay posibilidad usab nga ang mga sakop sa SAF mosulod sa mga interior portion sa mga barangay nga ginatutokan karon sa Inter Agency Task Force (IATF).
Hangyo ni Ferro sa nga Sugboanon nga makigtambayayong ug motuman sa mga lagda sa ECQ.
Makahatag sila sa suporta sa kapulisan pinaagi sa pagtuman sa di paggawas sa balay kon di kinahanglanon, social distancing ug kanunay nga pagsul-ob og mask.(BBT)