UPAT ka adlaw sa di pa mapupos ang enhanced community quarantine (ECQ) sa Dakbayan sa Sugbo, mga awtoridad naglibog pa kon unsa nga mga dapit ang ipaubos sa mas estriktong lockdown.
Ang ECQ status sa Dakbayan sa Sugbo, nga giingon sa mga opisyal nga maisip nga “lockdown”, mapupos na unta sa Hunyo 30.
Si Cebu City Mayor Edgardo Labella, sa usa ka press conference sa Hunyo 26, niingon nga ang Inter-Agency Task Force (IATF), Department of Health (DOH), Cebu City Health Department ug City Government nagtimbangtimbang pa sa pagpatuman og lockdown sa 12 ka barangays sa siyudad nga giisip nga “hotspot areas.”
Samtang ang mga opisyal nagtimbang timbang pa, si Department of the Interior and Local Government (DILG) Undersecretary ug Spokesperson Jonathan Malaya niingon nga dunay mga dapit sa Dakbayan sa Sugbo nga gipaubos sa localized lockdown.
Matod sa DILG website, ang containment zones sa siyudad naglakip sa Sambag II, Punta Princesa, Tejero, ug Inayawan.
Ang mga barangay nga naa sa hot spots ug ubos sa strict lockdown giila sa DILG nga mao ang mosunod: Sambag II; Kamputhaw; Sambag 1; Basak San Nicolas; Mabolo; Guadalupe; Lahug; Duljo Fatima; Tinago; Tisa; Ermita; ug Tejero.
Tipik kini sa 112 ka mga dapit sa nasod nga ubos sa segmental lockdown, matod ni Malaya.
Gitataw usab ni Labella atol sa press conference nga duna lay granular lockdown kun sityo level.
Ang 12 ka mgabarangays nga dunay labing daghang mga kaso sa coronavirus disease (Covid-19) sa Hunyo 26 naglakip sa Kamputhaw (125); Basak San Nicolas (109); Sambag 1 (106); Sambag 2 (96); Guadalupe (87); Mabolo (85); Lahug ug Duljo dunay tag 77 each; Tinago ug Inayawan tag 66; Tisa (65); ug Pardo (62).
“There is an ongoing evaluation because these 12 barangays do not need to be placed under barangay-wide lockdown. We can have segmental,” matod ni Labella.
Gipaneguro ni Labella nga kon duna may lockdown sa usa ka dapit, ang Siyudad mohatag sa mga panginahanglanon sa mga residente sama sa pagkaon, tambal ug tubig.(JJL)