NEGATIBO sa coronavirus disease (Covid-19) ang pito ka mga kawani sa Mandaue City Hall nga gipaubos sa RT-PCR swab test human nakahimamat sa nagpositibo sa Covid-19 sa City Administrator’s Office.
Lakip sa mga nag negatibo mao si Atty. Jamaal Calipayan, ang Mandaue City Administrator ug si Atty. John Eddu Ibañez, ang executive secretary ni Mandaue CIty Mayor Jonas Cortes.
Nadawat nilang Ibañez ug Calipayan ang maayong balita alas noybe sa buntag sa adlaw Biyernes, Hunyo 26, 2020.
Sa pakighinabi sa Superbalita Cebu ni Ibañez miingon kini nga sukad nahibaw-an nila nga usa sila sa mga first generation contact kadtong nagpositibo nag-isolate na dayon sila sa ilang balay niadtong Lunes, Hunyo 22, 2020.
Wala na sila nakighimamat ug mga tawo lakip na ang ilang pamilya aron dili na sila makatakod ug lain kung ugaling magpositibo sila.
Sa adlawng Martes, gikuha sila sa ilang balay aron i-swab human niini gi-isolate na sab sila og balik.
Karon nga nigawas na ang resulta sa ilang swab test, nagpaabot nalang silang Ibañez sa clearance cerificate gikan sa MAndaue City Health aron makabalik na sila sa ilang trabaho.
Tungod sa maong panghitabo miingon si Ibañez nga nagkastorya na sila ni Mayor Cortes ug ni Calipayan nga posible nga mag skeletal workforce na sila unya.
Sa pag-home isolation nilang Ibañez ug Calipayan nakaamgo sila nga daghang mga trabahoon nga napending.
Ang pagpatuman sa skeletal workforce parte sab sa ilang contingency plan, sigon ni Ibañez aron kung aduna pay mga magpositibo sa Covid-19 sa ilang opisina dili daghan ang mataptan ug mupaubos sa home isolation. (KFD)