KAPIN sa 16,000 ka mga locally stranded individuals (LSI) nga nagpabilin sa dakbayan sa Sugbo gumikan sa pagsuspenso biyahe sa mga barko pagawas sa siyudad.
Kini ang gipadayag ni Atty. Ian Kenneth Lucero, pangulo sa Department of Interior and Local Government (DILG) Cebu City kinsa maoy gitahasan ni Secretary Roy Cimatu, pagkuha sa mga individual nga wala makauli sa ilang balay gawas sa dakbayan.
Si Cimatu maoy gisangonan ni Presidente Rodrigo Duterte para maoy mo-oversee sa impelementasyon ug mopatuman sa mga lagda ubos sa Inter Agency Task Force para masugpo ang pagkuyanap sa Covid-19.
“Yesterday si Secretary Cimatu nag-advice sa Cebu City to get the total number of LSI nga mogawas pa sa Cebu City para maka-start na sila s quarantine so that when the time comes nga pwede na sila mobiyahe, atleast sayon nalang ang processing sa ilang document,” padayag ni Lucero
Si Lucero nagkanayon nga adunay 16,292 ka mga LSI gikan sa 72 ka mga barangay sa siyudad nga maoy iyang nadawat kagahapon, Hunyo 25.
Ang mga barangay nga wala pa makaduso sa ilang listahan ngadto sa City DILG mao ang Calamba,Inayawan,Mabolo,Pahina San Nicolas,Pamutan,Pung-ol Sibugay,Sudlon II ug Tisa
Gitug-an usab sa pangulo sa DILG sa Cebu City nga adunay kapin 11,000 ka mga LSI ang nakauli sa ilang destinasyon sa wala pa gisuspenso sa DILG 7 ang pag-isyu sa travel authority.
“Ang mga LSI nga nakagawas na sa Cebu City niabot nana sila og 11,000 plus as of yesterday nga na-process ang ilang travel authority and medical certificate nga nakabalik na sa ilang place of residences or home of origin.” dugang sa pangulo sa DILG Cebu City. (PAC)