IPASUBAY ni Lapu-Lapu City Mayor Junard Chan kon si kinsa maoy responsable nga milabay sa mga sinako nga ginamit nga syringes, blood sample vials, rapid test kits ug uban pang medical waste nga nagpasad sa bakante nga lote sa Sityo Seaside, Barangay Pajo.
Samtang si Pajo Barangay Kapitan Lyndel Bullos nagkanayon nga mopadangat sila og report base sa ilang gihimong pakisusi sa maong dapit, dungan sa report niadtong guwardiya nga maoy nitaho sa barangay niadtong Huwebes, Hunyo 25, ug ang mga kuha nga hulagway sa mga nilabay nga medical waste.
Ang mga dokumento iduso ngadto sa City Health Office ug sa buhatan sa mayor.
Si Chan namahayag nga iyang tahasan ang buhatan sa City Health ubos sa pamunoan ni Dr. Agnes Realiza ug ang City Environment and Natural Resources Office (Cenro) lakip na ang Solid Waste Management nga maoy mohipos sa maong hazardous waste materials.
Buot masayran sa mayor kon si kinsa maoy naglabay sa maong mga ginamit nga hospital waste ug diin kini maggikan o ang tinubdan nga ospital aran mahatagan og saktong giya.
Base sa gihimong pakisusi ni Bullos sa area kagahapon, Hunyo 26, nga dili kini maoy unang higayon nga gilabayan ang maong lugar sa maong matang sa basurang medical.
Sigun sa mga residente sa area nga daghan pang medical waste ang gitambak sa maong dapit ug sa gidugayon natabunan na sa mga tag-as nga sagbot.
Giingong itumong og gabii ang pagpanglabay sa wa mailhing mga tawo nga magbitbit og sako.
Si Bullos nagkanayon nga ilang i-cordon ang bakante nga luna gawas nga dili na kini palabayan, malikay sab ang mga kabataan nga mosulod sa dapit nga magduwa-duwa, ug kadtong ubang lumolopyo nga motuyo og sud sa lugar aron pagtubag sa sugo sa lawas.
“Makig-coordinate mi sa city health kon unsay buhaton ani? Dili mi magpasagad-sagad ani kay special garbage man gud ni ug wa ta kahibawo kon unsay risgo ba sa kanang worker sa barangay kon magpasagad-sagad mig hikap ani,” matod sa ni Bullos sa Superbalita Cebu. (FVQ)