Nakapahimulos sa modernong teknolohiya ang Rappler nga hanas sa online news site. Asa kaha makapusta. Dihay higayon nga gipasirhan sa chairman sa Securities and Exchange Commission (SEC) Teresita Herbosa gi-revoke ang mga papeles nga nakalapas sa gimbut-an sa batakang balaod nga ang prensa panag-iyahon sa mga Pilipino gumikan kay ang Rappler gikontrolar sa mga langyaw nga NBM ug Omidyar Network.
Nakalapas sab sa Securities Regulation Code tungod sa pagbaligya sa securities ubos sa Phil. Depository Receipts. Si Maria Ressa, pangulo sa Rappler misinggit nga dili makiangayon ang giluwatan sa SEC nga naghikaw sa kagawasan sa pagpadayag. Nagpadangat og petisyon ngadto sa Court of Appeals. Milaban sa Rappler ang International Human Rights, media watchdogs ug pipila ka mga magbabalaod sa oposisyon.
Si Pres. Rodrigo Duterte mitumbok sa Rappler nga hilabihan kaaktibo pagpanaway sa mga malapason apan migawas diay nga wala magsunod sa konstitusyon. Gihulagway nga fake news outlet kansang publikasyon bunga sa tumo-tumo. National Bureau of Investigation nakakitag probable cause sa walo ka mga kaso nga gisang-at. Ning ulahi sila Ressa ug Researcher-Writer Reynaldo Santos Jr. nahukman sa RTC-Manila nga guilty sa cyber-libel nga mabilanggo og unom ka tuig sa kaso nga gipasaka ni Magpapatigayon Wilfredo Keng. Sa sayo pa gi-ban sa Malacañang si Rappler reporter Pia Ranada nga igo lang nagtuman sa gisangon nga kaakohan pagpahibalo sa publiko sa mga panghitabo sa palibot. Matawag sab sila og mga bloggers nga dili ubos sa kontrol sa bisan asang ahensya sa gobyerno gawas kon dunay kalapasan.
Ang Rappler gipadagan sa professional journalists isip online news organization nga accredited sa Malacañang Press Core sukad pa sa 2013 nga independent nga kahugpongan sa mga mamahayag pinasubay sa probisyon sa konstitusyon diha sa kagawasan sa pagpadayag.
Apan natiktikan ni Pres. Duterte nga gihimong pohonan sa Rappler ang kahigayonan. Presidential Spokeperson Harry Roque mipasangil ni Ranada nga nagpasagad og blog. Agig sumbalik ang oposisyon mipasangil ni Communications Asec. Mocha Uson nga tigpakatap og fake news sa social media.
Gitataw nga sa Rappler naglabi ang opinyon nga nagtuis sa kamatuoran. Ang pagpadayag sa opinyon katungod sa tanan nga gipaangay sa atong balaod apan kon tinuyo ang lit-ag paglipat sa matuod usa na ka fake news. Gihimong taming ang kagawasan sa demokratikanhong nasod. Bisan gani ang kaguliyang sa kanasoran matang gihapon sa sonata sa demokrasya nga atong giunongan.