NAGTUO si American trainer Freddie Roach nga madayon ang away nila ni pound-for-pound champion Manny Pacquiao ug Floyd Mayweather Jr. kon wagtangon sa duha ka mga boksidor ang ilang panagbangi ug ang mga kinumo na lang mao ang payawyawon.
“I’m sure there’s going to be a tradeoff between Manny dropping the lawsuit and him (Mayweather) dropping the drug test,” matod pa ni Roach sa interbyu sa fighthype.com.
Nagsugod ang mainitong panagbangi nila ni Pacquiao ug Mayweather dihang giakusahan sa wa’y pildeng Amerikano ang Pinoy boxing superstar nga naggamit og ilegal nga druga hinungdan nga grabe gihapon ang kusog ug kaabtik niini bisan kapila na mosaka og timbang.
Si Pacquiao nakakulit sa kasaysayan isip bugtong boksidor nga nakasakmit og pito ka world titles sa managlahing weight divisions.
Ang panagharong sa duha sa labing sikat nga boksidor sa kalibutan, nga gituohang mokita og $100 million, diriyot na gyud untang mapahigayon apan naguba ang negusasyon dihang miinsister si Mayweather og Olympic-style blood testing.
Sa mga pasangil ug tagawtaw ni Mayweather, naaghat si Pacquiao sa pagpasaka og kaso batok sa no.2 pound-for-pound king.
Naglaom si Roach nga mausab ra ang hunahuna ni Mayweather ug pasagdan na lang niini nga ang boxing commission – nga mao gyud untay naandan - mao ang magbuot kabahin sa blood testing.
“I think that Mayweather is going to let the (boxing) commission do their job, as they always do. He’s saying now that he wants to clean up the sport,” matod sa four-time Trainer of the Year.
“I don’t think steroids are that used in boxing to be honest with you. I’m sure they’re out there because it’s part of our life in the society we live in today. We’re not going to let Mayweather run the show.”