DUHA ka mga kawani sa Cebu Provincial Capitol nangamatay, usa kompirmadong nasakit og coronavirus disease (Covid-19) samtang ang usa gisuspetsahan lang kay sa laing test siya negative.
Kini maoy gikompirmar ni Dr. Christina Gianggo, pangu sa Provincial Health Office (PHO) sa Hunyo 27, 2020.
Ang usa sa namatay mao ang 58 anyos nga babaye nga nagpuyo sa Dakbayan sa Sugbo.
Siya regular nga kawani sa Kapitolyo. Iyang kaso giisip lang nga suspected Covid case.
Siya nakasinati siya og simtomas sa Covid ug gipaubos sa swab test.
Nagpositibo ang unang resulta niini sa test, apan sa confirmatory ug base sa records sa Kapitolyo, negatibo na ang resulta.
“Kato siya, pag admit niya, gi swab siya sa usa ka private hospital. So after pila ka days, gipahibaw sila nga positive. Pero pag check namo sa among line list nga official, negative man siya ang result...Although negative, siya considered man gihapon siya nga suspect kay mao man ngadto sa Chong Hua. Nag start nalang sad ta og contact trace dinhi sa iyang office, but they are from Cebu City”,matod ni Gianggo sa mga tigbalita sa Hunyo 27, 2020.
Ang maong pasyente na admit sa hospital sa Hunyo 20 ug nakabsan sa kinabuhi sa Hunyo 25.
Ang ikaduha mao ang 53 anyos nga lalake nga taga dakbayan sa Sugbo.
Usa siya ka regular nga empleyado ug moabot 30 ka tuig nang nagtrabaho sa Kapitolyo.
Nagpakonsulta siya sa Hunyo 15 tungod sa nasinati nga simtomas. Sa maong higayon gipaubos siya sa swab test ug positibo.
Una siya nga gidala sa Cebu City Quarantine Center (CCQC), apan gibalhin sa Cebu City Medical Center (CCMC).
Matod ni Dr. Gianggo, hypertensive usab ang maong pasyente.
“Symptomatic man siya. Naa siyay symptoms, mild to moderate. So, amo siyang gi-refer sa CCQC. After mga two days, gi refer siya sa CCMC kay nimubo iyang oxygen saturation”, matod ni Gianggo.
Ang unang pasyente gikatakda nga ilubong sa Hulyo 2 samtang ang ikaduha gilubong na dayon.
Sa pagkakaron, gipahigayon na ang contact tracing sa mga nakahimamat sa mga pasyente.
Hinuon, atol sa pagtungha sa mga pasyente ubos pa sa skeletal workforce ang Kapitolyo, pasabot nga gamay lang ang mga tawo nga nahimamat niini sa opisina.
Wa motug-an si Gianggo kon asa kini nga mga opisina, apan sa pagkakaron bukas gihapon kini.
Wa na usa gipatungha ang mga empleyado nga may underlying health conditions, immunocompromised ug kadtong mga nag edad og 60 pataas aron malikay sa pagtakboy sa sakit.
Isip lakang pagpugong sa pagtakboy sa bisan unsa nga sakit, may mga gamit usab alang sa pag disinfect nga gi distribute ang Kapitolyo sa matag opisina.
Kinahanglan usab nga ipahibaw sa mga enpleyado ang sitwasyon niini sa panglawas aron ma monitor sa PHO.
Aron malikay sa mga pagduda, giklaro ni Gianggo nga ang mga empleyado nga namatay, wala na maka abot sa giluwatan nga memorandum sa Kapitolyo labot sa pagpatuob sa mga empleyado.
“Naa man gud kuan nila kaning tuob sa Capitol. Katong duha wala pa mi kasugod og tuob ato diri. Wala to sila ka tuob, katong naay memo? Wala pa to sila kay late naman ta nakasugod”, matod ni Gianggo.
Ang pamilya sa mga namatay makadawat og pinansyal nga ayuda gikan sa Kapitolyo.
Sa kinatibuk-an natala ang 12 ka mga positibo nga kaso sa Kapitolyo, duha na ang naka-recover ug duha ang nangamatay.