TULO ka mga tawo nga nahimamat ni Daanbantayan Mayor Sun Shimura ang nagpositibo sa coronavirus disease (Covid-19) base sa swab test human gipahigayon ang contact tracing.
Subay sa memorandum sa Kapitolyo, kadtong first generation lang, kun naka-direct contact sa nagpositibo sa virus, ang ipaubos sa reverse transcription-polymerase chain reaction (RT-PCR) pinaagi sa swab.
Pasabot nga kabanay, pamilya o mga kauban sa trabaho o opisina nga kanunay nga makauban sa pasyente.
Gipahibaw sa lungsod nga lima ang gipaubos sa pagsulay, duha ang nagnegatibo, ug tulo niini maoy nagpositibo sa Covid-19.
Ang tulo ka mga pasyente pulos taga Barangay Poblacion sa mao nga lungsod.
Una mao ang 63 anyos nga babaye nga nakasinati og mild symptoms sa Covid.
Ang ikaduha ug ikatulo mao ang 52 ug 34 anyos nga mga lalake. Pulos sila mga asymptomatic ug anaa nahimutang sa isolation facility sa lungsod.
Samtang, mipahigayon na usab og contact tracing ang Municipal Health Unit ug Daanbantayan Police Station sa mga first generation contacts o direktang nahimamat ug nakauban sa naasoy nga mga pasyente.
Gipailawom na usab ang mga indibidwal sa mandatory home quarantine aron pag monitor sa ilang mga panglawas.
Si Shimura maoy ikatulo nga pasyente nga nalista sa lungsod human nag positibo sa Covid sa Hunyo 21.
Sa kinatibuk-an, ang Daanbantayan nakatala na og unom ka mga positibong kaso sa Covid-19. (ANV)