SUPERBALITA CEBU

Mongaya: Mga bogo miresbak; Dino mokiha

Panahom

DILI lang mga tawo ni kanhi mayor Tomas Osmeña ang nagpakita sa Facebook nga nangampanya aron mopirma sa usa ka online petition alang sa pagpataktak sa katungdanan kang Presidential Assistant for the Visayas Mike Dino.

Naa kini sa change.org ug ang titulo mao ang “Replace OPAV Dino.” Para dili kita mawani sa kontrobersyal nga panghitabo sa Internet karon, mahimo kining inyong tan-awon karon dayon.

Miguwa silang film maker Bambi Beltran, Dr. Weng Burden, ug Byron Garcia, usa ka kanhi Capitol consultant ug igsuon ni Gob. Gwen Garcia. Nag-post sab si Tonyo Cruz, usa ka kolumnista nga naa sa NCR, ug ang hard-hitting commentator sa Syudad sa Mandaue nga si Edward Ligas. Dili kini sila mga supporter ni Osmeña.

Kagahapon lang ko nakakita sa post ni Kong. Bebot Abellanosa, nga usa ka BOPK, nga niapil sa mga nag-awhag nga mopirma sa maong petisyon. Dili kini gaan nga personalidad. Usa kini ka kongresista nga nag-representar sa south district.

CYBER LIBEL

Si Presidential Assistant Dino, sa iyang bahin, niingon nga mokiha siya og cyber libel ug iyang ipaimbestigar sa kapulisan kon si kinsa ang nagpasiugda sa maong online petition.

Dili ko suweto sa technical nga paagi kon unsaon kaha sa kampo ni Presidential Assistant Dino sa pagpawong niining maong kalihokan sa Internet. Padayon man gud nagtubo ang kadaghanon sa nangpirma.

Dili sab ordinaryo nga nakabasa sa mga isyo batok kang Dino kining mokapin na sa 4,000 ka mga nangpirma. Kay nipirma sila, buot ipasabot nga nakabasa, nakasabot, ug ning-uyon sa maong petisyon.

BOGO

Matod pa sa maong petisyon, nitumaw kini isip reaksyon sa paghingan ni Presidential Assistant Dino nga mga “bogo” ang mga nagtinguha nga matangtang siya sa katungdanan. Iyang gitumbok nga mga supporters kini ni kanhi mayor Osmeña.

Nahitabo ang maong paghingan nga “bogo” atol sa press conference diha sa Seda Hotel sa miaging Hunyo 23, 2020 uban sa lima ka mga secretary sa Duterte administration: Roy Cimatu, Francisco Duque III, Delfin Lorenzana, Eduardo Año, ug Carlito Galvez.

Matod niya, natubag na ang mga isyu ug ang niduso pa niini mga bogo. Basi sa unang nang-awhag nga mopirma sa maong petisyon, moguwa nga sayop si Presidential Assistant Dino nga kining gusto nga mawala siya sa katungdanan mga supporter sa kanhi mayor.

Nagduda sab ko nga iyang natubag na ang tanang mga isyu nga giisa sa maong petisyon.

(@anol_cebu sa Twitter)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph