NIADTONG normal pa ang situwasyon, sa wala pa ang Covid 19 pandemic, ang katawhan ug mga opisyal sa kagamhanan mao ang manghangyo sa mga public utility jeepney (PUJ) drivers ug operators nga dili molusad og transport strike kay dako kaayong purwesyo sa mga sumasakay. Matag higayon nga adunay idemanda o kawsa sama sa pagtaas sa presyo sa gasolina, ang drivers organizations sama aning militanteng Pinagkakaisang Samahan ng mga Tsuper at Operators Nationwide (Piston), molusad dayon og transport strike.
Kon molusad og transport strike kining maong grupo, mapurwesyo ang mga sumasakay labi pa sa urban areas sama sa Metro Manila ug dakbayan sa Sugbo gumikan sa kakuwang sa mga sakyanan. Wala pa man kaayoy buses kaniadto. Mo-deploy dayon ang kagamhanan sa ilang mga sakyanan, bisan garbage trucks, aron lang mahakot ang natanggong nga mga pasahero.
Mao nga mga hambugero ug arogante ang mga lider ning maong mga grupo kay adunay gisaligan. Ilang i-hostage ang mga sumasakay matag aduna silay i-demanda sa kagamhanan bisan sa issues nga walay labot ang ilang pangita sa transportasyon. Ila dayon i-paralyze ang dagan sa transportasyon.
Apan karon nabali na ang situwasyon. Ang traditional PUJ drivers ug operators na ang nanghangyo sa kagamhanan nga tugutan silang makabalik sa pagpamasada. Kini human wala pa tuguti sa kagamhanan pinaagi sa Department of Transportation (DOTr) ug Land Transportation Franchising and Regulatory Board (LTFRB) nga makabalik sa pagpamasahero tungod sa Covid 19 pandemic.
Ang modern PUJs lang ang gitugutan sa Inter-Agency Task Force for the Management of Emerging Infectious Disease (IATF) nga makabiyahe human gipa-ubos sa general community quarantine (GCQ) ang Metro Manila, gawas sa Cebu City nga ubos sa ECQ. Dili man god makasunod sa social distancing ang traditional PUJs gumikan sa design sa ilang sakyanan. Posible gani nga idayon na ang i-phase out sa ang mga karaang PUJs kay dugay naman gyud ning gihugon-hugon. Unya karon nanghangyo man lagi ang drivers sa kagamhanan. Kaniadto mga hambugero kaayo mong dagko. Karon pakiluoy man lagi mo. Mao ni giingon nga bawos-bawos lang.