NAKATALA ang Munisipalidad sa Ginatilan sa ikatulong kompirmadong kaso sa Covid-19 sa Sabado, Hunyo 27, 2020.
Sa Facebook post sa IHeart Ginatillan, ang bag-ong kaso usa ka pasyente nga nag-dialysis ug kanunay, o kaduha sa usa ka semana, nga mobisita sa Vicente Sotto Memorial Medical Center.
Matod pa, ang pasyente mohimulag sa isolation center kada uli niini gikan sa siyudad.
Niadtong Hunyo 24 milarga sa Dakbayan sa Sugbo ang pasyente apan pag-abot sa ospital, naglisod na kini og ginhawa. Gipa-admit kini ug gipaubos og swab test.
Nakadawat ang Municipal Health Office sa resulta sa swab test Sabado ug positibo kini sa coronavirus.
Nagpahigayon na ang lokal na kagamhanan sa Ginatilan sa pag-contact trace sa mga na direct contact sa bag-ong pasyente.
Samtang, ang asawa niini padayon na gimonitor ug gipaubos usab sa isolation.
Gi-hangyo ang tanang residente nga magpabilin sulod sa balay ug mosunod sa mga health protocols sama sa social distancing ug kanunay na pagpanghunaw sa kamot. (RSR)