RONNIE Alonte ug Loisa Andalio malipayon sa ilang relasyon sa usag-usa ug gani sa mga nakita nato sa mga litrato gi-enjoy sa duha ang nahitabong quarantine sa ilang probinsya.
Apan kalit usab na-ukay ang fans sa duha sa dihang nakita nila sa Instagram post ni Ronnie ang picture sa duha nga magka-holding hands nga nag-atubang sa usa ka dakong balay nga medyo wala pa mahuman.
Miabot na ba sa punto nga nagkalawom ug misaka nas laing level ang relasyon sa duha.
Silang Ronnie ug Loisa nakita nato together nga mga upat na siguro ka tuig gani atong miaging November ilang gisaulog ang ilang ikatulo nga anibersaryo.
Katapusan natong nakita ang duha sa pelikulang “James and Pat and Dave”.
Mag-uban ug balik ang duha sa usa ka proyekto para sa Kapamilya channel nga “Cara y Cruz”.
Daghang mga pangutana ang mitumaw kon magtipon na ba sila o padong na sa kaminyuon ang gisubay nga dalan sa ilang relasyon?
Huwaton lang nato unsay tubag niini nilang Ronnie Alonte ug Loisa Andalio ug ang konpirmasyon sa duha, Ay’g Saba!
***
Nahimong emosyonal kaayo si Sarah Geronimo sa dihang nag-uban sila sa entablado sa “ASAP Natin To” ni Regine Velasquez miaging Dominggo.
Sa wala pa mahitabo ang ilang duet gipasigarbo na kanunay ni Regine ang mga nahimong achievements sa iyang gitawag nga anak-anakan sa industriya.
Kini tanan gitubag usab ni Sarah pinaagi sa iyang dakong pasalamat sa tanang suporta ug pagmahal kaniya sa Asia’s Songbird sukad pa sa pagdaug niini sa programang “Star for a night” hangtod karon nga nagkauban sila sa ASAP.
Forever na ang ilang friendship ug love sa usag-usa lakip na usab sa mga supporters ug fans nilang pareho, Ay’g Saba!
***
Super excited ang JC de Vera sa dihang mi-atubang kini sa trabaho og balik pinaagi sa iyang guesting sa programang “Magandang buhay” nilang Melai, Jolina ug Karla.
Kinsa man kuno ang dili ma-excite nga una kini niyang pag-gawas sa balay ug trabaho pa ang hinungdan, human sa nahitabong quarantine.
Wala na daw niya huna-hunaa ang mga kakulba nga dala ining coronavirus, ang importante para kaniya nga makasugod og balik sa trabaho human sa tulo ka buwan nga “Stay At Home.”
Isip ginikanan usab may mga kahadlok siya nga gibati, apan mipatigbabaw usab ang iyang gusto nga maka-provide kutob sa iyang mahimo para sa iyang pamilya.
Positibo lang siya kanunay sa tanang panghitabo ug sa bisan unsang grasya nga moabot kaniya, mao nay amahan di buh, Ay’g Saba!