NABILANGGO sa Compostela Police Station ang usa ka bus driver human mamatay sa iyang pagkulata ang 70 anyos niyang uyoan niadtong Miyerkules sa gabii, Hunyo 24, 2020 sa Purok 1, Barangayt Mulao, lungsod sa Compostela.
Gidakop sa kapulisan si Rolando Morre, 47, minyo, drayber sa Ceres bus, human mamatay sa Danao District Hospital niadtong Huwebes, Hunyo 25, ang iyang uyoan nga si Eupretes Pepito
Si Pepito na-comatose sa tambalanan.
Si Captain Vincent Zozobrado, hepe sa Compostela Police Station nga nahinabi sa Superbalita Cebu, niingon nga ang anak ni Pepito nga si Regelito, 37, minyo, maoy ni-report sa kapulisan niadtong Huwebes sa alas 8:40 sa buntag nga gikulata siya ni Morre niadtong Miyerkulis sa gabii samtang naglingkod siya sa ilang balay.
Niabot si Morre nga hubog, way daghang pangutana, gidiretso siya sa pagkulata.
Bisan kon nabungog na siya sa mga kumo, nakamaniho siya sa pagdagan ug nakapangayo abag, nakatago sa ilang silingan.
Ang iyang amahan nga nakabantay sa kagubot, nigawas sa balay, apan gisugat ni Morre.
Ang iyang amahan nibadlong kang Morre, apan nasuko, gikulata.
“Nagpakiluoy intawon ang tiguwang nga husto na pero gipauwanan gihapog kinumo hangtud nga natumba, nawad-ag panimuot,” dugang ni Zozobrado.
Matod ni Zozobrado nga namatay si Pepito kay wala makaagwanta sa mga bun-og.
MIANGKON
Si Morre nialigar nga iyang nakulatahan ang mga biktima kay nagtuo siya nga maoy niatang ug nibunal kaniya.
Gibutyag niya nga hubog siya niadtong higayuna kay nagtagay uban sa mga higala.
Sa pagpauli niya, giatangan siyag duha mga tawo ug gibunalan hinungdan nga nawad-an siyag panimuot.
Dihang naulian siya, maoy nakita niya ang mga Pepito hinungdan nga iyang gipangsuntok ug gikulata kay nagtuo siya nga kini maoy mibunal kaniya.
Nihilak si Morre sa pagkamatay sa iyang uyoan.
Kasong murder ug serious physical injury ang gipasaka batok kang Morre. (GPL)