USA ka giilang high value target nga drug personality sa Dakbayan sa Carcar nadakpan sa mga sakop sa Philippine Drug Enforcement Agency (PDEA)-7 ug Regional Drug Enforcement Unit (RDEU) 7 niadtong Biyernes sa hapon, Hunyo 26, 2020 sa Barangay Bolinawan, Dakbayan sa Carcar.
Si Leiah Alcantara, tigpamaba sa PDEA 7, niila sa suspek nga si Jericho Infantado, 45, nagpuyo sa nahisgutang dapit.
Matod ni Alcantara nga si Infantado nadakpan pinaagi sa buy-bust.
Nakuhaan si Infantado og shabu nga moabot na og tunga sa kilo ang timbang nga dunay Dangerous Drugs Board (DDB) value nga P3.4 milyones.
Matod ni Alcantara nga sa ilang pasiunang kasayuran, makabaligya si Infantado og usa ka kilo nga shabu matag semana.
Si Infantado gi-monitor sulod na sa dul-an tulo ka semana ug dihang nakompirmar, gihimo ang buy-bust. (BBT)