SAMA og ghost town ang Cebu City kon tan-awon gikan sa kahanginan.
Mao kini ang paghulagway ni Police Lieutenant General Guillermo Eleazar, pangu sa Joint Task Force Covid Shield nga nilibot sa Dakbayan sa Sugbo luwan sa helicopter sa Philippine Air Force (PAF) gikan sa Central Command (Centcom) sa Sabado, Hunyo 27, 2020.
Iyang kuyog si Police Brigadier General Albert Ignatius Ferro, pangu sa Police Regional Office (PRO) 7.
Matod ni Eleazar sa pakighinabi sa Superbalita Cebu, lahi ang iyang nakita sa kadalanan sa Dakbayan sa Sugbo sa naobserbahan sa Inter Agency Task Force (IATF) ug sa national task force nga gipangulohan ni Environment Secretary Roy Cimatu.
“Sumakay kami sa chopper at nakita namin from the air na parang ghost town ang Cebu City. Siguro kasi Sabado ngayon. That is contrary to the observation of the high officials of the IATF and national task force few days ago when they visited Cebu City. Dahil nakita nila they reverted the quarantine status from GCQ to ECQ dahil maraming tao sa lansangan,” sulti ni Eleazar.
Matod ni Eleazar nga ang presensya sa dugang mga pulis, apil na ang Special Action Force (SAF), dunay maayong epekto sa dakbayan nga mao na lay bugtong dapit sa nasod nga ubos sa enhanced community quarantine (ECQ).
Human sa iyang paglibot luwan sa chopper, iyang gipakigkitaan ang mga sakop sa Special Action Force (SAF).
Matod niya nga ang iyang pagduaw sa Sugbo maoy pagpakita sa ilang suporta sa kapulisan sa dakbayan.
Gipahinumdoman ni Eleazar nga ang SAF gipadala sa Dakbayan sa Sugbo aron estriktong ipatuman ang mga quarantine protocol.
Matod niya nga nasuwayan na ang katakos sa SAF hinungdan nga sila gipadala dinhi.
“Bakit kayo? Dahil subok na kayo. Hindi pa nga kayo dumating, nababalitaan na at nagpag-usapan na ang ating pag dating, Nagpapakita lang ito ng ating kababayan sa kanilang paghanga, “ dugang ni Eleazar.
Si Eleazar niingon nga kon wa pa gipailawom sa GCQ ang dakbayan, hayan managhan pag samot ang mga natakdan sa coronavirus disease (Covid-19).
Sugod sa Hunyo 16, gibalik ang Siyudad sa Sugbo sa ECQ gikan sa general community quarantine status tungod sa nagkadaghang mga kaso sa Covid.
Ang Cebu City maoy dunay labing daghang mga kaso sa Covid 19 sa tibuok nasod.
Tungod niini, gipadala ni Presidente Rodrigo Duterte ang pipila sa iyang mga sakop sa Kabinete, pinangulohan ni Cimatu.
Mokabat sa 12 ka mga barangay nga dunay labing taas nga mga kaso sa Covid-19 ang giplanohang ipailawom sa hard lockdown.
Sugod sa Dominggo, Hunyo 28, ang mga sakop sa SAF magpatrolya na sa kadalanan libot sa Dakbayan sa Sugbo.
Ila usab nga abagan ang mga checkpoint sa kadalanan.
“Kaya ang trabaho ninyo dito madali at kapakipakinabangan sa totoo lang,” nagkanayon si Eleazar.
“Sa ating law enforcers, gawin lang natin ang pag approach sa ating mga kababayan nang maayos. Hindi na kailangan yong arestohan, kundi ang dapat ay susunod lang ang ating kababayan sa guidelines na ipinapatupad sa PNP,” pahindumom ni Eliazar sa mga sakop sa SAF.
WA DID-I
Gipahinumdoman ni Cebu City Police Office (CCPO) officer-in-charge Police Colonel Cydric Earl Tamayo ang mga tig-deliver og mga pagkaon nga di magpalabi og pagabii sa dan.
Bisan tuod kon gitugotan sila ubos sa quarantine protocol isip tig-deliver sa mga pagkaon ug essential goods, dunay curfew sa kagabhion nga angay tumanon.
“Between curfews bawal na gyud na sila tungod kay kinsa pa man ang mokaon ana nga gabii na man, paingon sa kaadlawon, wala na man siguro,”pagpasabot ni Tamayo sa Superbalita Cebu.
Gipatuman karon sa Dakbayan ang curfew gikan sa alas 8 sa gabii hangtod sa alas 5 sa buntag samtang ubos pa sa ECQ.
Iyang gitataw nga ang mga tig deliver sa mga pagkaon sama sa Food Panda ug Grab Food, wa did-i, labina sa adlawan.
“Siguro wala lang sila nagkasinabot. Wala tay instruction niana nga gidili na ang pagpadagan sa mga riders nga nag deliver og pagkaon,” dugang ni Tamayo.