SUKAD nausab ang atong Batakang Balaod kabahin sa piliay diin gitangtang ang duha ka partido nga sistema sa pulitika ug gitugtan ang nagkalainlain nga partido nga mopadagan sa iyang kandidato, bisag unsa na lang ang ngan sa partido-pulitikal, labi na sa mga partylist, ang na rehistro sa Commission on Elections (Comelec), nga mora na lang og limay singko nga kendi.
Ang general elections karon nga tuig di sama niadtong 2016 sa pagdagan ni Presidente Rodrigo Durterte, nga bisan og daghan sila nga kandidato pagka president, apan ang local nga mga kandidato klaro ang ilang gisuportahan nga kandidato pagka presidente ug bise presidente.
Sa Mayo 9, 2022 nga piliay, ang mga lokal nga kandidato dinhi sa Cebu sa pagka gobernador hangtud sa mayor sa mga lungsod ug dakbayan, lahi-lahi ang ilang gisuportahan nga kandidato pagka presidente ug bise presidente. Tungod ba ni kay daghan ang mapilian nga kandidato pagka presidente ug bise president? O, di ba kaha duna pay mas lawom nga rason.
Si Cebu Gob. Gwen Garcia, chairperson sa One Cebu Party ug magpasubli, wala pay gi-indorso nga kandidato pagka presidente apan iyang gisuportahan si Davao City Mayor Sara Duterte-Carpio, nga kandidato pagka bise presidente, nga kauban ni Bongbong Marcos (BBM), nga kandidato pagka presidente ubos sa Partido Federal ng Pilipinas (PFP).
Si Manila Mayor Isko Moreno, kandidato pagka presidente sa Aksyon Demokratiko, ang gisuportahan ni Cong. PJ Garcia, manghod ni Gobernador Gwen ug secretary-general sa One Cebu Party. Matud pa ni Congressman Garcia, di siya makasuporta ni BBM tungod sa nagpadayon pa nga kaso sa Comelec batok ni BBM sa pagpakanselar sa iyang certificate of candidacy tungod sa pagpamakak sa iyang kaso sa tax evasion.
Apan si Liloan Mayor Christina Garcia-Frasco, anak ni Gobernador Gwen, ug iyang bana, 5th District Cong. Duke Frasco, way dikidiki sa pag-anunsyo sa ilang supporta sa BBM ug Sara team. Sa ato pa, ang BBM-Sara team naglawig sa kinto distrito tungod kay ang Bakud Party, nga gipangulohan ni Danao City Mayor Nito Durano, ang BBM ug Sara team ang gisuportahan.
Motuo ka'g sa dili, si Ace Durano, nga kandidato pagka gobernador ubos sa Bakud Party sa iyang amahan, Mayor Nito Durano, wala pay giindorso nga kandidato pagka presidente apan ang alyansa sa BBM-Sara Team, si Ace ang ilang kandidato pagka gobernador apan wa gilakip si Bise Gob. Junjun Davide, ang kauban ni Ace, nga magpasubli pagka bise gobernador, tungod kay iyang ang kandidato pagka presidente si Vice Pres. Leni Robredo man.
Ang piliay karon sa presidente, bise presidente ug mga lokal nga opisyales mao ni gitawag nga saksak-sinagol kay dunay mga lokal nga kandidato nga kauban og partido apan managlahi ang ilang kandidato pagka president ug bise president. Dunay magkaatbang nga kandidato apan pareho sila og kandidato pagka presidente ug bise presidente.
Sa dakbayan sa Sugbo, ang gisuportahan ni Mayor Mike Rama ang BBM-Sara Team apan ang iyang kauban nga si kanhi Konsehal Joey Daluz sa Panaghiusa, ang gisuportahan si Isko Moreno pagka presidente ug Sara pagka bise presidente. Morag si Sen. Manny Pacquiao ang nawala sa mapa nga kandidato pagka presidente.