PAMPANGA

Garcia: Ing Takut Mipaymburisan (The Fear of Abandonment)

Kapisik

“ULING ding ibpa ku’t indu pepaymburisan da ku,

dapot ing Ginu daklutan na ku.

Ituru Mu kanaku ing dalan Mu, O Ginu,

at tayran Mu ku king patag a gasgas

uli ding kasalang ku.

E Mu ku darala king kapagnasan da ring kanakung kalaban,

uling ding malaram a saksi memanikdo la laban kanaku

at mangisnawa lang kasikampwan.

Malumbe ku sana nung e ku menwala

a akit ku ing kayapan ing Ginu

king gabun ding mabye.

Panayan me ing Ginu;

Magi kang masikan at bustan mung mikatepangan ya ing pusu mu;

Wa, panayan me ing Ginu.

~Dalit, Dangka 27: Sunis 10-14

(Psalms 27:10-14)

“Magpakasikan ka’t magpakatapang, e ka tatakut at mangalgal karela,

uling ing Ginung kekang Dyos makatuki Ya keka.

E na ka paburen o paymburisan.”

~Pamiyulit, Dangka 31: Sunis 6

(Deuteronomy 31:6)

“Uling meyagyag ku, a aliwa ing kamatayan, o ing bye man,

o upaya, aliwa mu naman ing kasalungsungan, o ding mamanyatang a bage,

a ketasan, aliwa mu naman ing kelalaman, o aliwang lelangan,

ing malyaring makapagpakawani kekatamu king lugud ning Dyos,

a ati king Kristung Yesus ing Ginu tamu.”

~Ding Romanu, Dangka 8: Sunis 30-39

(Romans 8:30-39)

“Ati ka namang lumbe pala ngeni, dapot pakikitan da kang pasibayu,

at ing pusu mu tumula ya, at alang makapagpalako king tula mu.”

~ Wan, Dangka 6:Sunis 22

(John 16:22)

“King mumuna kung pamaglwalu alang dintang bang tikdo lele ku,

dapot likwan da ku ngan. E sana mipaparsala ita karela!

Dapot ing Ginu tinalakad Ya siping ku at pepasiknangan Na ku.”

~Kadwang Timoteu, Dangka 4: Sunis 16-7

(2 Timothy 4:16-17)

***

Alang lulugud keka kabud makabagsak at ala nang nanu mang nabangnan da keka. Kanitang dakal ka pa salapi, dakal ka kakaluguran at kamaganak. Kanitang atin ka pang dakal a upaya, dakal lang lalapit at kakampi keka. Kanitang sikat ka pa at matagumpe, dakal lang makipagmasusi keka at buri da abe da ka keng larawan at ing lagda mu pakikwanan deng isulat me e mu keng papil nung e pati kareng imalan da, agyang bayu ya pa.

Dakal lang lalapit keka bang makipagkaluguran nung mabandi ka, mayupaya ka, masikanan ka at mibantug. Antimong malyari mong iyawa keng nung nanu man ing atsu kekang kayapan o kapalaran. Suywan da ka, pamatulan at pakitanan katapatan bang mipalapit la keka. Kulang namu nung e da ka dukwan at uman bitis agya man deng aliwa agyang matwa ka pang e palak karela sisikloran da ka bang ipakit da ing galang da keka.

Anggang nukarin naman ita? Anggang kapilan da gawan ngan ita keka?

Ing kamatutwan, inya mu buri da ka reng aliwa uling atin la mung nanabangnan keka. Nung ala na, lakwan da na ka’t kalingwan, mekad isakwil nung e man pikarine da ka pa. Ing pekamaplas at pekamasakit kabud mesakit ka at makarate na–e da ka man dalawan agyang balu da ing kabilyan mu.

Linta lang mituring a kabang nanabangan da ing daya mu alang makapalako keng kalawat da keka, dapot kabud kinabsi na la’t mekapagtabugak keka—lakwan da na ka’t kalingwan nung e man ibalugse anting basan o layak–mengari king tukung mekaradam duldul.

Kanita yakmul mu namu ing sablang tutulung lwa karing mata mu’t daragus king asna kaskup a salu mu.

Dapot, ini ing e mu sukat kakalingwan–paymburisan da ka ma’t lakwan ngan ding sabla–ing Ginung alang panayang kapalit king lugud na Keka at alang kapupusan pakalulu–kapilanman e na ka lakwan at paymburisan agyang saguli mu.

***

Dake Talabaldugan:

1. lingawngáw/lingongó (palagyu) malabug a aksing. English - unintelligible murmur of a crowd. Alimbawa king pamangamit: “Makalanging buntuk ing lingongo nabengi kabang manenaya kaming datang la ring tinipan a tau Menila bayu la magpalage sine.”

2. lingkag¹ (panguri) bigkag, tungkab, lansag. English - with the look destroyed, vanquished. Alimbawa king pamangamit: “Lingkag la reng sablang pesitagun keng kayaldawan nang Yasmin uli ning maslag nang pangatau migit pa king legwan ning piblas na’t pangimut asna kanayun.”

3. lingkag² (panguri) sukab, lilu, palamara, alang katapatan, dakilang mapamirait. English - corrupt, wicked evil-minded, traitor, treasonous. Alimbawa king pamangamit: “Alang ninu man a lingkag king balen ing e memayaran karatang ning makasadyang panaun ning kaparusan.

4. lingkís (palagyu) makalingkis, batibat, balibad; paluput, gapus asna katigik. English - tightly bound by a tie coiled around one or many. Alimbawa king pamangamit: “E na ayulagpusan ing lingkis ning bitin keng sese nang kambing Saming angga na inyang memangkad ya rugu mapilan mung penandit.

***

SADYANG GAWI DA RENG KAPAMPANGAN

Karing alus sablang banwang mengalabas--balang ka-28 ya ing bulan ning Unyu--deng magpanata kang Apung Iru sasanglad la keng pibale-bale nung nu ya manuknangan –Sulipan–i Apung Iru siglulu lang manik bang asuglapan de agyang penandit mu. Ita bayu magmula ing patingapun a libad bayu pa king kapyestan nang tagana. Deng magpanata magdala lang yampang dang bulaklak, pamangan o salapi para kang Apung Iru. Kakasna ya ing bale, mula at pati na dalan karing taung e papansing keng lisangan, pangabilad, pamanikal at pagal ba’mung makalapit la king karelang patulunan–i Apung Iru.

King panaung iti, e na maulit ita uling dakal ing bawal a pepabalu ding manungkulan a kapabalwan para karing bisang makipamyesta at e ta pa balu nung kapilan maulit pasibayu ing libad pamandakit at pamanatad kang Apung Iru.

Maligayang kapagmasusysan king Kayaldawan da ri Apung Iru at Apung Ambu, Unyu 28-30 agya mang alang libad king banwang iti.

***

PIGAMPA: Ing Kapisik manalig yang misubling pasibayu ing lagablab ning legwan ning Kapampangan kapamilatan ning pamipasigla king keyang Kalinangan—ding keyang dalit, kawatasan, amlat at miyayaliwang kapaglalangan.

PARASAN: Pagnasan na niting ing paralan ning panyulat at sablang dake ning Kalinangan tamu a telukyan ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan.

Malyaring sumulat king garciakragi@yahoo.com parakaring kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph