SAMTANG nagkaduol na ang eleksiyon, nagka-init ug nagkanindot na usab ang kamada sa pulitika dinhi sa Sugbo. Ang ubang mga kandidato morag nigawas na ang tinud-anay nga kolor. Morag alibangbang nga bisan asa lang nga buwak maniba. Balimbing.

Talagsa rang pulitiko karon ang adunay palabra de honor. Kana bang mosuporta gyod og kandidato nga lunod-patay gayod.

Hinuon, dili usab kita makabasol niining mga pulitiko nga magbalhin-balhin og partido kay resulta na kini sa multi-party system. Kay kon two party ra unta ta, aw, duha ra gayod ang ilang kapilian. Apan ang importante gud aning mga lokal nga kandidato nganong magbalhin-balhin og partido mao man ang funding. Kuwarta nga magamit sa ilang kampaniya. Talagsa ra kaayo nga mga pulitiko nga mogamit sa ilang kaugalingon nga kuwarta alang sa eleksiyon. Kadaghanan magsalig sa funding sa national party.

"The Manny Pacquiao Blog". Click here for stories and updates on the Filipino boxing champ.

NAMALHIN

Karon nigawas na gayud ang tinud-anay nga kolor sa ubang mga kandidato. Unang gihugon-hugon nga ang pipila ka mga kongresista sa Sugbo mobali sa ilang suporta ngadto kang Senador Manny Villar sa Nacionalista Party. Natinuod gayud kay si sixth district Congresswoman Inday Nerrisa Soon Ruiz, kinsa molansar pagkamayor sa Mandaue City, nilayat naman. Nibiya na si Inday Nerry sa One Cebu Party ni Gov. Gwen Garcia nga nisuporta kang Gibo Teodoro.

Apan mosuporta lang gihapon si Inday Nerry kang Gwen ug sa running mate niini nga si Glenn Soco. Sa pagsuporta sa presidente lang siya nibali gikan kang Gibo ngadto kang Villar.

Daghan pa kunong kongresista ang mobali ngadto kang Villar. Si first district Congressman Eduardo Gullar una nang nisuporta ni Villar ug gani nipasalig kini nga makakuha og ubay-ubay nga boto si Villar dinhi sa Sugbo. Sa dakbayan, ang grupo sa Kusog nga gipanguluhan ni kanhi mayor Alvin Garcia, kinsa kandidato pagkamayor, mao usab ang nidala sa kampaniya ni Villar. Mag-Villar na kaha ang Sugbo?

CHOP CHUEY

Samtang si Mayor Tomas Osmeña ug ang iyang Bando Osmeña Pundok Kauswagan (BOPK) todo suporta nila Noynoy Aquino ug Mar Roxas sa Liberal Party. Si Gov. Garcia nagsaksak sinagol sa gisuportahan nga mga kandidato. Wala siya mobiya ni Gibo Teodoro kay aduna kuno siyay palabra de honor. Apan si Loren Legarda ang gisuportahan sa pagkabise presidente. Unya lain-lain usab nga mga kandidato pagkasenador ang iyang gisuportahan. Makalibog no?

(bobby@sunstar.com.ph)