USA ka 22-anyos ang ika-29 nga kaso sa coronavirus disease (covid-19) sa Cagayan de Oro human kini nagpositibo sa severe acute respiratory syndrome coronavirus 2 (SARS-CoV-2) niadtong Biyernes, Hunyo 26, 2020.
Kini usa ka babaye nga locally stranded individual (LSI) gikan sa Manila ug residente sa numbered barangay sa siyudad.
Gibutyag ni Dr. Joselito Retuya, City Epidemiologist sa City Health Office (CHO) nga niabot sa Laguindingan Airport niadtong Hunyo 16 mga alas 7 sa buntag ang pasyente.
Giingong diretso kini nga gidala sa city isolation unit (CIU) ug na-swab kini niadtong Hunyo 23. Nigawas ang positibong resulta niadtong Hunyo 26,2020.
“Ang pasyente karon kasamtangang naa sa atong temporary treatment and monitoring facility. Gikan sa CIU nato, ato siyang gibalhin ngadto sa atong monitoring facilities aron gyud makita nato ug mamonitor nato siya nga naa kauban sa atong mga confirmed cases sa atong TTMF,” matud ni Retuya.
Giingong nakigkoordina na usab kini aron masuta ang ang mga kauban sa flight nga gikan sa Manila ug niabot sa Laguindingan Airport niadtong Hunyo 16.
Nagpadayon pa ang contact tracing sa CHO kalabot na niining bag-ong kaso sa dakbayan.
Ang 29 ka mga natalang Covid-19 sa siyudad diin duha niini gikan sa numbered barangay, tulo sa Barangay Bulua; 11 sa Barangay Carmen; tulo sa Barangay Lumbia; usa sa Barangay Kauswagan, Barangay Indahag, Barangay Iponan, Barangay Agusan, Barangay Nazareth ug Barangay Pagatpat; ug upat sa Barangay Camaman-an.
Sa mga kaso, unom niini ang namatay, 10 na ang nakarekober ug 13 ang aktibo nga kaso.